Na hety momant kala 20 členaŭ Biełaruskaj sacyjał-demakratyčnaj partyi (Hramada) zajavili pra namier bałatavacca ŭ deputaty Pałaty pradstaŭnikoŭ Nacyjanalnaha schodu Biełarusi na sioletnich vybarach.
Jak paviedamiŭ BiełaPAN namieśnik staršyni BSDP (Hramada) Ihar Barysaŭ, rašeńnie ab udziele ŭ vybarach, jakija projduć vosieńniu hetaha hoda, było pryniataje Centralnym kamitetam partyi kala miesiaca tamu.
Siarod tych, chto vyrašyŭ bałatavacca ŭ parłamient, Barysaŭ nazvaŭ takich viadomych palitykaŭ i hramadskich dziejačaŭ, jak Aleh Trusaŭ, Miečasłaŭ Hryb, Aleh Vołčak. U najbližejšy čas hety śpis papoŭnicca, ličyć namieśnik staršyni partyi.
Jak adznačyŭ Barysaŭ, BSDP (Hramada) nie admaŭlajecca i ad taho, što jaje pradstaŭniki ŭvojduć u ahulny śpis kandydataŭ u deputaty ad demsił, kali taki budzie sfarmiravany. Kančatkovaje rašeńnie pa farmacie ŭdziełu ŭ vybarčaj kampanii budzie pryniataje na pazačarhovym źjeździe partyi, jaki namiečany na červień, paviedamiŭ Barysaŭ.
Nahadajem, 18 śniežnia apazicyjnyja palityki Mikałaj Statkievič, Uładzimir Niaklajeŭ i Stanisłaŭ Šuškievič abjavili pra stvareńnie arhkamiteta pa padrychtoŭcy kanhresa demakratyčnych sił dla vypracoŭki adzinaj pazicyi, u tym liku pa ŭdziele ŭ parłamienckaj kampanii. 21 śniežnia staršynia BSDP (Hramada) Iryna Vieštard zajaviła BiełaPAN, što jana nie suprać praviadzieńnia takoha kanhresa i vypracoŭki adzinaha padychodu da parłamienckaj kampanii. «Ale, ščyra skažu, ja nie maju vialikaj upeŭnienaści, što heta atrymajecca», — dadała jana.