Vieniesuelskaja apazicyja, jakaja atrymała pa vynikach vybaraŭ 6 śniežnia bolšaść u parłamiencie, abrała staršynioj Nacyjanalnaj asamblei hienieralnaha sakratara partyi «Demakratyčnaje dziejańnie» Enry Ramasa. Jaho kandydaturu ŭ niadzielu padtrymali 62 z 111 zakanadaŭcaŭ.
«My budziem samastojnaj, a nie supraćdziejnaj siłaj. U nas niaprosty paradak dnia, ale my jaho vykanajem», — skazaŭ Ramas paśla abviaščeńnia vynikaŭ.
Pa vynikach vybaraŭ 6 śniežnia apazicyja ŭ Vieniesuele ŭpieršyniu za 17 hadoŭ zmahła atrymać upeŭnienuju pieramohu na hałasavańni ahulnanacyjanalnaha maštabu. Atrymaŭšy pieravahu amal u dva miljony hałasoŭ, apazicyjny Błok demakratyčnaha adzinstva (BDA), u jaki, u pryvatnaści, uvachodzić partyja «Demakratyčnaje dziejańnie», zavajavaŭ 109 z 167 miescaŭ u adnapałatnaj Nacyjanalnaj asamblei, jašče try mandaty dastalisia pradstaŭnikam karennaha nasielnictva, jakich apanienty čavistaŭ ličać svaimi prychilnikami. Adzinaja sacyjalistyčnaja partyja (JESP) Vieniesueły na čale z Maduram atrymała 55 miescaŭ, na 41 mienš, čym u parłamiencie raniejšaha sklikańnia.
Adnak u kancy śniežnia vybarčy kamitet Viarchoŭnaha suda Vieniesueły pastanaviŭ pierahledzieć vyniki vybaraŭ u štacie Amasonas. U vyniku try deputaty ad BDA i adzin ad JESP nie zmohuć uvajści ŭ skład parłamienta, pakul budzie razhladacca dadzienaja sprava.
Takim čynam apazicyja na dadzieny momant pazbaviłasia kvalifikavanaj bolšaści ŭ 112 mandataŭ, jakaja dazvoliła b joj adklikać členaŭ Viarchoŭnaha suda, inicyjavać praces daterminovaha spynieńnia paŭnamoctvaŭ Madury i navat sklikać refierendum ab uniasieńni źmianieńniaŭ u kanstytucyju.
