Instytut sacyjałohii Nacyjanalnaj akademii navuk Biełarusi vyvučyć mierkavańnie nasielnictva ab mahčymym pavyšeńni piensijnaha ŭzrostu padčas rehularnaha apytańnia ŭ sakaviku, paviedamiŭ 5 studzienia na pres-kanfierencyi ŭ Minsku dyrektar instytuta Ihar Katlaroŭ.
Pierad tym jak uklučyć adpaviednyja pytańni ŭ ankietu, na bazie instytuta projdzie śpiecyjalny sieminar, u jakim čakajecca ŭdzieł ministra pracy i sacyjalnaj abarony Marjany Ščotkinaj.
Jak zaznačyła zahadčyca adździeła sacyjałohii sacyjalnych inavacyj Instytuta sacyjałohii Vijaleta Šuchatovič, pakul u instytucie apierujuć źviestkami papiarednich apytańniaŭ. «Na samaj spravie, usie bačać i ŭsie viedajuć, jaki ŭzrost vychadu na piensiju ŭ našych susiedziaŭ, usie viedajuć ekanamičnuju situacyju ŭ Biełarusi, tamu ja b skazała tak: ludziam nie chaciełasia b hetaha pavyšeńnia, ale jany z razumieńniem staviacca da taho, što piensijny ŭzrost buduć pavyšać», — skazała Šuchatovič.
Naša dziaržava, dadała jana, vybrała «miakki šlach, abraŭšy takuju mieru, jak adkładvańnie vychadu na piensiju z atrymańniem peŭnych bonusaŭ». «Zhodna z našymi apytańniami, prykładna 18% nasielnictva, jakoje pracuje, u 2013 hodzie zaznačyła, što jany hatovyja adkłaści ŭzrost vychadu na piensiju z umovaj pavyšeńnia piensii», — skazała sacyjołah.
Pavodle jaje słoŭ, «bolšaja častka nasielnictva, jakoje pracuje, hatovaja da taho, što hety ŭzrost pavysicca na hod». «Viadoma ž, hetyja źmieny nie pavinny być rezkimi, ale kali sapraŭdy ŭźniknie takaja finansavaja nieabchodnaść, i jana ŭžo abmiarkoŭvajecca, to da hetaha pastupovaha pierachodu naša nasielnictva hatovaje, ale mienavita da pastupovaha», — padkreśliła Šuchatovič.
***
Nahadajem, u kastryčniku 2015 hoda Alaksandr Łukašenka zajaŭlaŭ, što pytańnie pra mahčymaje pavyšeńnie ŭ krainie piensijnaha ŭzrostu pavinna «vyrašacca praź ludziej». «My pavinny paraicca ź imi, budziem ich pierakonvać, prasić ich zhody», — skazaŭ tady kiraŭnik dziaržavy.
17 śniežnia ministr pracy i sacyjalnaj abarony Marjana Ščotkina paviedamiła žurnalistam, što ministerstva śviadoma adyšło na čas ad abmierkavańnia temy pavyšeńnia piensijnaha ŭzrostu. Zaraz vielmi važna, «što kaža hramadstva, jakija prapanujucca šlachi vyrašeńnia pytańnia», skazała jana. Takim čynam ministerstva «vykonvaje nakaz prezidenta ab tym, što pytańni treba abmierkavać z hramadstvam», dadała Ščotkina.
Pavodle źviestak Minpracy, jakija 4 studzienia pryviała na pres-kanfierencyi namieśnik načalnika hałoŭnaha ŭpraŭleńnia piensijnaha zabieśpiačeńnia ministerstva Łarysa Jaškova, piensijaniery ŭ Biełarusi składajuć 27% nasielnictva, ź ich čverć praciahvajuć pracavać. Čakajecca, što da 2020 hoda dola piensijanieraŭ pavialičycca da 29%.
U Minpracy padkreślivajuć, što na postsavieckaj prastory zastalisia tolki try dziaržavy z raniejšym piensijnym uzrostam (60 hadoŭ dla mužčyn i 55 hadoŭ dla žančyn) — heta Biełaruś, Rasija i Uźbiekistan.
