Žychar Bresta Ivan (tut i dalej usie imiony źmienienyja) z narkotykami pasiabravaŭ daŭno. Tamu nieadnarazova pryciahvaŭsia da kryminalnaj adkaznaści pa artykule «Niezakonny abarot narkatyčnych srodkaŭ». U apošni raz jon byŭ vyzvaleny paśla adbyćcia pakarańnia, majučy niaźniatuju i niepahašanuju sudzimaść. Adnak na šlach vypraŭleńnia stać nie zachacieŭ, a abraŭ zvykłuju dla siabie złačynnuju darožku.
Razam sa svajoj sužycielkaj Hannaj, jakaja taksama pryciahvałasia da adkaznaści za anałahičnaje złačynstva, Ivan viarnuŭsia da staroj dziejnaści. Na praciahu kala siami miesiacaŭ niaŭdačlivyja działki paśpieli prarabić niemałuju pracu. Jany nie tolki nabyvali, ale i samastojna vyrablali i realizoŭvali narkatyčnyja i psichatropnyja rečyvy. Pa miescy žycharstva fihurantaŭ kryminalnaj spravy byli znojdzienyja marychuana, acetylavany i ekstrakcyjny opij, roznyja tabletki i vyrablenyja ź ich preparaty… Taksama ŭ chodzie śledstva vyznačanyja troje hramadzian (žychary Bresta, Žabinki i Drahičyna), jakim realizoŭvalisia narkotyki. Zrešty, častku niebiaśpiečnych rečyvaŭ abvinavačanyja ŭžyli sami.
Ale najbolšuju cikavaść u kryminalnaj spravie vyklikaje epizod, źviazany sa sprobaj naładzić dastaŭku narkotykaŭ u vypraŭlenčuju kałoniju. Mienavita tam adbyvaŭ pakarańnie patencyjny spažyviec praduktu, vyrablenaha złačynnaj paračkaj.
Dla praviadzieńnia apieracyi Ivan i Hanna pryciahnuli trecich asob — svaich znajomych Ihara i Irynu. Adnak u padrabiaznaści vyrašyli ich nie pryśviačać, prosta paprasili dastavić palimierny pakiet sa skrutkam na terytoryju papraŭčaj ustanovy. Pasyłka ŭtrymoŭvała cikavaje načyńnie: tam znachodzilisia marychuana masaj 2,74 hrama i paraškapadobnaje rečyva, jakoje źmiaščaje ŭ svaim składzie niebiaśpiečny psichatrop — psieŭdaefiedryn, masaj 3,6 hrama. Ihar pieradaŭ na čyhunačnym vakzale pakiet Irynie, jakaja i dastaviła jaho, papiarednie schavaŭšy ŭ intymnym miescy, na terytoryju kałonii. Adnak doŭhačakanaha spatkańnia nie adbyłasia: žančynu zatrymali supracoŭniki milicyi, kanfiskavali skrutak ź niebiaśpiečnymi rečyvami.
A hałoŭnyja fihuranty kryminalnaj spravy paŭstali pierad sudom. U žniŭni 2015 sud Leninskaha rajona Bresta pryznačyŭ Ivanu 13 hadoŭ pazbaŭleńnia voli, a jaho chaŭruśnicy Hańnie — 11 hadoŭ pazbaŭleńnia voli.
