«Jon niespadziavana tuzanuŭ nahoj i trapiŭ pa miedsiastry. Heta byŭ nie ŭdar, atrymałasia mašynalna, čałaviek chacieŭ ustać. Ja vybačyŭsia pierad miedsiastroj, skazaŭ, što heta adbyłosia vypadkova», — raspavioŭ čałaviek, što supravadžaŭ zahinułaha pacyjenta.
Paśla hetaha jany pajšli ŭ inšy kabiniet. Zatym tudy pryjšła miedsiastra razam z doktaram, jakomu pakazała na pacyjenta, što kranuŭ jaje nahoj.
«Doktar tuzanuŭ jaho mocna za ruku, u inšy kabiniet chacieŭ mabyć advieści, moža być, kab udaryć. Ja padniaŭsia i kažu: «Ty što robiš? My ž u špitali». Paśla hetaha sam atrymaŭ kuču udaraŭ», - rastłumačyŭ śviedka.
Nieŭzabavie mužčyna ačomaŭsia i ŭbačyŭ, što jaho siabar lažyć i nie dychaje. «Mianie vyvieli ŭ kalidor, a jamu pačali akazvać miedycynskuju dapamohu, kali jon užo nie dychaŭ», - dadaŭ jon.
***
Pa viersii śledstva, 29 śniežnia 2015 u balnicu ŭ rasijskim Biełharadzie pastupiŭ pacyjent, jaki ŭ chodzie praviadzieńnia adnoj z pracedur udaryŭ nahoj miedsiastru. «Doktar zastupiŭsia za miedrabotnika i ŭdaryŭ pacyjenta pa tvary. Mužčyna ŭpaŭ. Pryčynaj śmierci paciarpiełaha stała čerapna-mazhavaja traŭma ad udaru patylicaj ab ćviorduju pavierchniu padłohi», - raspaviali ŭ SK.
8 studzienia telekanał «360 Padmaskoŭje» apublikavaŭ videazapis, na jakim vidać, jak doktar nanosić mocny ŭdar pacyjentu, paśla čaho toj padaje i nie padaje prykmiet žyćcia. Daktary pasprabavali vyratavać pacyjenta na tym ža miescy. Praź niekatory čas jaho vyvieźli z pałaty na katałcy. Taksama doktar źbiŭ mužčynu, jaki supravadžaŭ pacyjenta.
Kryminalnuju spravu ŭ dačynieńni da ŭrača zaviali pavodle artykuła «pryčynieńnie śmierci pa nieaściarožnaści». U ciapierašni čas miedyk zvolnieny i znachodzicca pad padpiskaj ab niavyjeździe.
