Kampanija «Haradski laśničy» ekałahičnaha tavarystva «Zialonaja sietka» abjaŭlaje pra pačatak manitorynhu dreŭ na vulicach i ŭ parkach Minska, paviedamiŭ aktyvist kampanii, inžynier lesu Ihar Korzun.
Da ŭdziełu ŭ acency i ŭliku dreŭ zaprašajucca ŭsie nieabyjakavyja žychary stalicy. Śpiecyjalna dla manitorynhu byŭ raspracavany błank uliku paškodžanych nasadžeńniaŭ, jaki buduć zapaŭniać vałanciory.
Metaŭ u manitorynhu niekalki, raspavioŭ Korzun. Pieršaje — pa vynikach praviedzienaha ŭliku dreŭ płanujecca stvaryć anłajn-kartu dreŭ, parkaŭ i skvieraŭ stalicy z apisańniem i historyjaj kožnaha abjekta, jakaja budzie apublikavanaja na sajcie kampanii «Haradski laśničy».
Akramia taho, z dapamohaj kampanii i śpiecyjalistaŭ Instytuta ekśpierymientalnaj bataniki płanujecca vyrašyć važnyja pytańni, naprykład prablemu miechaničnych paškodžańniaŭ nižniaj častcy stvałoŭ dreŭ, jakija rastuć uzdoŭž haradskich vulic i daroh. Na dumku aktyvistaŭ «Haradskoha laśničaha», u 70% vypadkaŭ paškodžańnie dreŭ adbyłosia pa vinie supracoŭnikaŭ darožnych słužbaŭ. Pry aŭtamatyzavanaj uborcy śniehu abo pry pieramiaščeńni bujnahabarytnaj techniki stvały nasadžeńniaŭ atrymlivajuć surjoznyja paškodžańni. Heta adna z pryčyn, pa jakoj z kožnym hodam dreŭ stanovicca ŭsio mienš. Adbivajecca i toje, što vierchaviny kron abrazajuć, paśla čaho čverć dreŭ čaściakom žyvie tolki paru hadoŭ.
«Śpiecyjalisty Instytuta ekśpierymientalnaj bataniki daŭno kažuć pra biessensoŭnaść praviadzieńnia hetaj tak zvanaj amaładžalnaj abrezki, a ŭ bolšaści jeŭrapiejskich krain heta ličycca varvarstvam, jakoje viadzie da skaračeńnia žyćcia dreva, — padkreśliŭ Korzun. — My pramanitorym usie drevy, dzie była praviedzienaja abrezka, i z pačatkam pieryjadu viehietacyi pahladzim, u jakim jany znachodziacca stanie, da čaho pryviali hetyja dziejańni».
Dalej kampanija «Haradski laśničy» źviartaje ŭvahu na adsutnaść infarmacyi ab vyžyvalnaści i efiektyŭnaści kampiensacyjnych azielanialnych pasadak. Taksama jość prablema paškodžańnia karaniovaj sistemy ŭ vyniku rekanstrukcyi parkaŭ i skvieraŭ. U pryvatnaści, adznačyŭ Korzun, darožki prakładvajucca biez uliku dreŭ, jakija rastuć tam, i ich karanioŭ.
«U haradskoj administracyi ja adkazy na hetyja pytańni atrymać nie mahu — jany paciskajuć plačyma», — adznačyŭ Korzun.
Paśla zaviaršeńnia zboru infarmacyi aktyvisty padaduć svaje dadzienyja ŭ administracyi rajonaŭ, kab vyrašyć prablemy abychodžańnia z drevami i ich niapravilnaj abrezkaj, a taksama ŭ adpaviednyja instytuty i viedamstvy Akademii navuk.
«Adnym abureńniem my nie damožamsia vynikaŭ, — ličyć śpiecyjalist. — Treba, kab kožny nieabyjakavy minčuk uziaŭ pasilny ŭdzieł u žyćci svajho horada i dapamoh praanalizavać haradskoje asiarodździe i źmianić staŭleńnie kamunalnych słužbaŭ da abjektaŭ raślinnaha śvietu, a nie čakać litaści ad haradskoj administracyi».
