Niekatoryja pytańni pry abmierkavańni novaj prahramy mier ekanamičnaj palityki dla Biełarusi pakul zastajucca adkrytymi, paviedamili ŭ pradstaŭnictvie Mižnarodnaha valutnaha fondu ŭ Minsku.
U pradstaŭnictvie nahadali, što padčas raboty apošniaj misii MVF u Minsku byŭ dasiahnuty značny prahres pry abmierkavańni mier ekanamičnaj palityki, jakija mahli b być padtrymanyja damoŭlenaściu ab trochhadovaj prahramie.
«Razam z tym niekatoryja pytańni zastajucca adkrytymi. Abmierkavańnie ekanamičnaj prahramy z aficyjnymi orhanami praciahvajecca», — udakładnili ŭ pradstaŭnictvie fondu.
Pieršy namieśnik prem`ier-ministra Vasil Maciušeŭski padčas spravazdačy Alaksandru Łukašenku 11 studzienia zajaviŭ, što Biełaruś raźličvaje pačać novuju prahramu z MVF u studzieni — pačatku lutaha. Jak paviedamiła pres-słužba prezidenta, Łukašenka byŭ prainfarmavany ab tym, što «pryncypovyja pytańni pa hetym kirunku praktyčna źniatyja».
Misija MVF pad kiraŭnictvam Pitera Dołmana znachodziłasia ŭ Minsku z 9 pa 20 listapada 2015 hoda. Meta vizitu składałasia ŭ acency źmienaŭ u ekanomicy za apošni čas i abmierkavańni novaj ekanamičnaj prahramy, jakaja mahła b być padtrymanaja finansavymi resursami MVF.
Paśla zaviaršeńnia vizitu Dołman zajaviŭ, što piersanał MVF i aficyjnyja orhany Biełarusi damahlisia «istotnaha prahresu ŭ abmierkavańni šerahu mier ekanamičnaj palityki, jakija mahli b być padtrymanyja damoŭlenaściu ab trochhadovaj prahramie ŭ miežach Miechanizmu pašyranaha finansavańnia (JEFF). Dla abmierkavańnia niekatorych pytańniaŭ patrabujecca bolš času».
Alaksandr Łukašenka 17 listapada na sustrečy ź Piteram Dołmanam zajaviŭ, što znajomy z prapanovami MVF adnosna pierśpiektyŭ adnosinaŭ ź Biełaruśsiu. «Pavinien skazać, što ŭ mianie ni adzin prapanavany punkt nie vyklikaje nijakaha nieprymańnia, nijakaj alerhii», — skazaŭ jon.
Prapanovy fondu, pavodle słoŭ kiraŭnika dziaržavy, zasnavanyja na absalutna ab`iektyŭnych zakonach ekanomiki. «Formuła adna: atrymlivaješ pasłuhu — płaci za hetuju pasłuhu ŭ poŭnym ab`iomie. Ci heta budzie elektryčnaść, ciapło, transpartnaje absłuhoŭvańnie i hetak dalej», — skazaŭ jon.
«Pytańnie tolki ŭ adnym — u terminach, — dadaŭ Łukašenka. — Nie dumaju, što ŭ nas budzie vielmi vialikaja raźbiežka ŭ razumieńni hetych terminaŭ i ŭ terminach naohuł. My taksama nacelenyja na toje, kab prapanovy, jakija my vypracavali razam z vami, realizavalisia ŭ miežava karotkija terminy».
Novaja prahrama z fondam praduhledžvaje atrymańnie Biełaruśsiu kredytu da 3 młrd. dołaraŭ. Dla realizacyi kredytnaj prahramy viasnoj minułaha hoda baki padrychtavali darožnuju kartu pa strukturnym refarmavańni ekanomiki.
U 2009—2010 hadach Biełaruś atrymała ad MVF u miežach prahramy stand-by piać tranšaŭ kredytu na ahulnuju sumu 3,46 młrd. dołaraŭ.
Biełaruski bok nieadnarazova zajaŭlaŭ pra zacikaŭlenaść u realizacyi novaj prahramy z MVF, adnak u fondzie źviartali ŭvahu na niehatoŭnaść uładaŭ krainy da hłybokich strukturnych reform, što nieabchodna dla adnaŭleńnia kredytnaha supracoŭnictva.
