Nižniaja pałata parłamienta Tadžykistana adnahałosna pryniała papraŭki, zhodna ź jakimi ŭ krainie zabaraniajecca zaklučeńnie šlubaŭ pamiž blizkimi svajakami i ŭvodzicca abaviazkovaje miedycynskaje abśledavańnie maładych par pierad viasiellem.
Z hetaha času ŭ Tadžykistanie u šlub zabaraniajecca ŭstupać stryječnym bratam i siostram, a taksama dziadźkam i ciotkam sa svaimi plamieńnicami i plamieńnikami.
Treba adznačyć, što praktyka zaklučeńnia šlubnych sajuzaŭ pamiž bližejšymi svajakami ŭ Tadžykistanie šyroka raspaŭsiudžanaja, asabliva ŭ hornych, sielskich rajonach respubliki.
Pavodle dadzienych ministerstva achovy zdaroŭja krainy, kala 30-35% dziaciej-invalidaŭ narodžanyja ad baćkoŭ, jakija znachodziacca ŭ blizkaj rodnaści, i heta vyklikaje surjozny niepakoj uładaŭ.
«Jość vypadki, kali ŭ adnoj siamji čatyry dziciaci majuć zahany raźvićcia. I jany narodžanyja ad par u blizkarodnasnych sajuzach. Ad zdarovych baćkoŭ naradžajucca hłuchija, ślapyja dzieci. My praviali maštabnaje abśledavańnie pa ŭsioj krainie, i pa vynikach vyśvietliłasia, što pryčynaj invalidnaści staŭ mienavita faktar rodnasnych šlubaŭ», — raspaviała tadžykski deputat Hułbachor Ašurava.
Papraŭki, pryniatyja da zakona «Ab dziaržaŭnaj rehistracyi aktaŭ hramadzianskaha stanu» i ŭ Siamiejny kodeks krainy, ustupiać u siłu z 1 lipienia 2016 hoda.
U dadzieny momant urad krainy, jaki prapanavaŭ hetyja papraŭki, vyznačaje pieralik miedycynskich analizaŭ, jakija pavinny zdać pierad viasiellem maładyja pary, miechanizm kantrolu za rodnasnymi suviaziami tych, chto ŭstupaje ŭ šlub, a taksama pakarańnie, jakoje budzie praduhledžana ŭ vypadku nievykanańnia pryniatych normaŭ.
Miarkujecca, što da parušalnikaŭ zakona buduć prymianiacca štrafnyja sankcyi.
Tadžykskija deputaty pryznajucca, što pieršapačatkova mnohija parłamientaryi taksama byli suprać novaŭviadzieńniaŭ, admaŭlajučysia padtrymać zabarony na tradycyi, jakija majuć šmatviakovuju historyju.
«U mnohich tadžykskich siemjach ličać, što šluby ź blizkimi svajakami harantujuć biaśpieku i dobraje staŭleńnie da žančyny. Takija šluby, na dumku ludziej, jašče bolš zmacoŭvajuć svajackija adnosiny. Adnak na praktycy ŭ vypadku razvodu kanflikty i kryŭdy pamiž svajakami mohuć być značna strašniejšyja, čym kali b heta byli čužyja ludzi. Pierastajuć kamunikavać blizkija svajaki — siostry, braty. I kryŭda moža ciahnucca hady, a to i ŭsio žyćcio», — tłumačyć Ašurova.
