Trahiedyja adbyłasia ŭ stareńkaj chruščoŭcy ŭ byłym vajskovym haradku Barysava. U pieršym padjeździe ŭčora znajšli zahinułymi žycharoŭ kvatery na trecim paviersie — pažyłuju paru hadoŭ 70-ci. Krychu paźniej, da viečara, uzłamali dźviery ŭ kvatery na druhim paviersie — tam zahinuła siamja z čatyroch čałaviek.
Fota: Dźmitryj Bruško, TUT.BY
Nastascia z mužam i čatyrochhadovym dziciem žyvie ŭ pieršym padjeździe na čaćviortym paviersie. Jana adnoj ź pieršych adčuła pach hazu, pieradaje ź miesca zdareńnia Kaciaryna Pancialejeva, TUT.BY.
— Ja pačała panikavać jašče a šostaj-siomaj ranicy. U mianie chvareje dzicia, i my navat na vulicu nie mahli vyjści — takaja słabaść. Vyklikała i chutkuju, i hazavikoŭ, i supracoŭnikaŭ domakiraŭnictva. I ŭsie mnie kazali, što ŭsio ŭ paradku.
Pieršy raz Nastascia patelefanavała ŭ hazavuju słužbu a 7.00 ranicy 27 studzienia — praz paŭhadziny śpiecyjalisty pryjechali.
— U kvatery była prosta hazavaja kamiera, my adčynili ŭsie vokny. U mianie padniaŭsia cisk, stajaŭ šum u vušach i byŭ stan nieprytomnaści.
Pa słovach Nastaśsi, śpiecyjalisty adkazali, što butan jość u pavietry, ale prybory nie pakazvajuć, što heta haz, i turbavacca nie varta.
— Hazaŭščyki adkryli-zakryli kranik — i skazali, što ŭsio ŭ paradku. Ale było vielmi młosna, ja nie mahła ŭstać, nohi padkošvalisia. Ja vyrašyła, što heta pačynajecca hryp abo prastuda.
Na druhi vyklik hazaŭščyki nie pryjechali, skazali, uspaminaje Nastaśsia, što heta pach bytavoj chimii, adaranta.
— Ja pahuhliła i vyśvietliła, što adarant dadajuć u haz dla nadańnia pachu. Nam pašancavała, što ŭ našaj kvatery staić niejtralizatar pachaŭ, mahčyma, heta vyratavała nam žyćcio.
U prybiralni, vannaj i na kuchni kvatery Nastaśsi stajaŭ mocny pach hazu, i jana źviarnułasia ŭ domakiraŭnictva.
— Pryjšli piać čałaviek. I jany skazali, što ŭciečki hazu nie było.
Tady žančyna pajšła pa susiedziach: na druhim i na trecim paviersie dźviery nichto nie adamknuŭ.
Dniom Nastu zabrali ŭ balnicu. Ź dziciem zastaŭsia muž, jaki viarnuŭsia z pracy ŭ Minsku. Mužčyna raspaviadaje, što adčuŭ pach jašče a treciaj hadzinie nočy 27 studzienia. Pach stajaŭ, i kali jon adjazdžaŭ na pracu — u 6.45.
— Ale jon byŭ niejki saładžavy, tamu ja nie staŭ źviartać uvahu.
Kala šaści viečara da pažyłoj pary na trecim paviersie pryjechaŭ syn: baćki nie adkazvali na zvanki, i jon vyrašyŭ vysadzić dźviery. U kvatery znajšli zahinułych muža i žonku.
— Voś tady da našaha domu i pačali źjazdžacca i słužby hazu, i chutkaja, i milicyja. Zajšli i da nas: adkryvajcie vokny, čadny haz. Ale pa majoj viersii, heta byŭ bytavy haz.
U siamji, jakaja žyła na druhim paviersie, byŭ sabaka: susiedzi ŭžo pryvykli da taho, što jon pastajanna breša. I tolki pad viečar źviarnuli ŭvahu — z kvatery nie danosicca ni huku.
— Ja vyrašyŭ, što heta vielmi dziŭna, i paprasiŭ uzłamać dźviery. A tam — taksama miortvaja siamja. Baćka ŭ ich vajskoviec, dvoje dziaciej-školnikaŭ. Usie zahinuli.
Darečy, susiedzi zahinuŭšych kažuć, što pa dadzienych, pradstaŭlenych śledčym, 24 studzienia ŭ domie praviarali hazavyja kałonki.
— Ale da nas z pravierkaj sapraŭdy nichto nie prychodziŭ.
***
Alaksandr, jaki žyvie ŭ čaćviortym padjeździe, raspaviadaje, što jamu ŭviečary patelefanavaŭ brat, jaki pracuje ŭ MNS, i paprasiŭ pierakryć usie kałonki. Alaksandr raspaviadaje, što vyratavalniki spačatku zajšli ŭ kvateru na 3 paviersie. Pažyły mužčyna lažaŭ kala paroha. Mahčyma, jon sprabavaŭ vyjści z kvatery.
Praz akno ratavalniki patrapili ŭ kvateru na druhim paviersie. Na kuchni kala stała lažali mama (žančyna pracavała povaram) i dačka-adzinaccacikłaśnica. U vańnie - 10-hadovy syn, čaćviortakłaśnik. Vady ŭ vańnie nie było. Cieła baćki-vajennaha znajšli ŭ zale na kanapie. Kali vyratavalnik padyšoŭ da kałonki, jana šypieła, i jon pierakryŭ kranik. Mahčyma, nie było ciahi, tamu kałonka patuchła. Jak miarkujecca, mahła być prablema z vyciažkaj.
- Nakolki ja čuŭ, heta było nie udušša, a atručvańnie. Heta byŭ čadny haz.
***
Pieršym namieśnikam staršyni Śledčaha kamiteta, što kaardynuje pracu na miescy zdareńnia, raspačata kryminalnaja sprava pa art. 428 Kryminalnaha kodeksa Respubliki Biełaruś pa fakcie nienaležnaha vykanańnia słužbovych abaviazkaŭ słužbovymi asobami MPU «Barysaŭmižrajhaz», što paciahnuła hibiel šaści čałaviek.
U ciapierašni čas śledčymi vyvučajecca kanfiskavanaja ŭ adpaviednych arhanizacyj dakumientacyja, dapytvajucca śviedki. Pryznačanyja ekśpiertnyja daśledavańni.
Barysaŭski filijał UP «Minskabłhaz»: «Mahčymaja pryčyna hibieli ludziej — atručvańnie čadam»
Dyrektar Barysaŭskaha filijała RUP «Minskabłhaz» Arkadź Suškin prakamientavaŭ Onliner.by trahiedyju:
— Pa fakcie hibieli šaści čałaviek u Barysavie pa vulicy Dniaproŭskaj, 6 možam patłumačyć nastupnaje. Kancentracyi pryrodnaha hazu ŭ žyłych pamiaškańniach vyjaŭlena nie było. Mahčymaja pryčyna hibieli ludziej — atručvańnie čadnym hazam z pryčyny niapravilnaj pracy dymavych i vientylacyjnych kanałaŭ.
Žychary śćviardžali, što hazavymiaralniki pakazvali pieravyšeńnie, adnak Suškin zapeŭniŭ:
— Kancentracyju čadnaha hazu, to bok praduktu hareńnia, pakazvajuć asobnyja prybory, jakija ŭ našaj arhanizacyi nie praduhledžany. Našy prybory vyznačajuć tolki kancentracyju mietanu i butanu. Bolš ničoha. Zaŭsiody buduć ludzi, jakija skažuć advarotnaje, ale my ŭčora sami tam byli i možam skazać, što nie było kancentracyi pryrodnaha hazu. Usio astatniaje zmoža patłumačyć tolki Śledčy kamitet.
Ab vynikach pravierki, dumaju, daviedajucca ŭsie.
A voś što napisaŭ čytač «Našaj Nivy» ŭ kamientach:
«Atrucilisia ludzi, najchutčej, z-za čadu, najaŭnaść jakoha i paćvierdzili astatnija žychary doma, — napisaŭ u kamientarach na «Našaj Nivie» adzin z čytačoŭ. — Kali na hazaraźmierkavalnaj stancyi dadali zašmat adarantaŭ u pryrodny haz, to pry jaho hareńni nie ŭvieś adarant vyharaje. I tady jon daje pach, jaki ŭsio prymajuć za pach hazu. Miarkujučy pa fatahrafii, u kvatery prysutničaje hazavaja kałonka, jakaja padklučana da vientylacyjnaha kanała. A voś ci spraŭny jon? Pytańnie. Usie viedajem, jak zdajuć damy budaŭniki, jakoje śmiećcie zastajecca ŭ tym liku i ŭ vientkanałach. Z časam moh adkałocca kavałak bietonu i zakarkavać vientsistemu. Kałonka zapalena, čadnamu hazu vychodzić niama kudy. U vyniku — achviary! Tak ci inakš, va ŭsim raźbiarecca śledstva. Nie śpiašajciesia rabić vysnovy», — padsumoŭvaje čytač.
