Śledčy kamitet raspačaŭ kryminalnuju spravu ŭ dačynieńni da hrupy z 11 čałaviek, jakija padazrajucca ŭ kradziažy paliva na sumu bolš za 1 młrd rubloŭ z naftapraduktapravoda Połack-Vientśpiłs, paviedamiŭ siońnia staršynia Śledčaha kamiteta Biełarusi Ivan Naskievič na pasiadžeńni kalehii viedamstva pa vynikach pracy za 2015 hod.
«U Viciebskaj vobłaści dziakujučy karpatlivaj i zładžanaj pracy supracoŭnikaŭ Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS i Śledčaha kamiteta dniami vykryta arhanizavanaja hrupa. Zatrymanyja 11 čałaviek, jakija zajmalisia kradziažom dyzielnaha paliva šlacham niezakonnaj urezki ŭ mahistralny naftapraduktapravod Połack-Vientśpiłs, dla čaho byŭ prakładzieny rukaŭ daŭžynioj kala dvuch kiłamietraŭ», — skazaŭ Ivan Naskievič.
Pavodle dadzienych śledstva, dla zachoŭvańnia dyzpaliva vykarystoŭvaŭsia reziervuar, jaki byŭ schavany pad haspadarčyja pabudovy zharełaha domaŭładańnia ŭ adnoj ź viosak Viciebskaj vobłaści. U arhanizacyi złačynnaha biznesu padazrajecca 44-hadovy žychar Brasłava.
Pavodle apieratyŭnaj infarmacyi, schiema dziejničała z 2013 hoda. Dla ŭrezki ŭ naftapraduktapravod i adpampoŭvańnia haručaha vykarystoŭvałasia sučasnaje abstalavańnie, jakoje zakuplałasia za miažoj. «Užyvańnie technałohii nie dazvalała ŭ režymie realnaha času zafiksavać spad cisku ŭ trubach i, adpaviedna, spyniać kradziež», — adznačyli ŭ Śledčym kamitecie.
Kab vykryć złačynnuju hrupu, apieratyŭniki pracavali hod. «Dziejańni padazravanych kvalifikavanyja jak kradziež, učynieny hrupaj asob, u asabliva bujnym pamiery», — dadali ŭ viedamstvie.
Śledčyja i apieratyŭniki pracujuć z zatrymanymi, pravodzicca ahlad miesca ŭrezki ŭ naftapraduktapravod i schovišča z palivam. Kančatkovuju sumu škody jašče treba budzie vyśvietlić.
