77-hadovaja žycharka Barysava źviarnułasia ŭ stamatałahičnuju palikliniku sa skarhaj na toje, što joj «pieraškadžajuć» jaje zdymnyja zubnyja pratezy. Pryčynaj dyskamfortu akazalisia novyja zuby, jakija pačali rezacca ŭ žančyny.
Doktar, da jakoha pryjšła piensijanierka, vyznačyŭ, što ŭ jaje raście zub. A panaramny zdymak pakazaŭ, što jon nie adziny — usiaho ich akazałasia try. Jak vyśvietliłasia, hod nazad žančynie ŭžo vydalili zub mudraści, jaki pačaŭ raści, kali joj spoŭniłasia 76 hadoŭ.
«Usio ŭ mianie nyła, baleła, ja prymała abiazbolvalnyja preparaty. Kali daviedałasia, što heta novyja zuby, vielmi ździviłasia. Ale doktar skazaŭ, što ŭ jaho ŭžo byŭ vypadak, kali i ŭ 80-hadovaj pacyjentki raśli novieńkija zuby. Nie daj, Hospadzie, źviedać takuju «radaść»», — kaža piensijanierka.
Žančyna 55 hadoŭ pražyła ŭ Murmansku i tolki try hady tamu pierabrałasia ŭ Barysaŭ da svajakoŭ. Pra svajo charčavańnie kaža, što jano zvyčajnaje. Piensijanierka lubić čyrvonuju rybu, ikru. Dziakujučy niaviestcy, jakaja kłapocicca pra jaje, prymaje dobryja vitaminy.
««Treciaja źmiena zuboŭ» u ludziej vielmi stałaha ŭzrostu — źjava redkaja. Ale takija vypadki ŭ majoj 20-hadovaj praktycy taksama byvali. Jak praviła, u stałym uzroście źjaŭlajucca tak zvanyja «zuby mudraści». Niaredka ich źjaŭleńnie stymulujuć źniešnija faktary. Naprykład, tyja ž samyja pratezy», — raspavioŭ doktar-stamatołah adnoj ź minskich klinik Barys Barejka.
