Škoła ŭ ahraharadku Racičy Hrodzienskaha rajona, dzie 11 lutaha nieviadomym rečyvam atrucilisia 42 školniki, budzie začynienaja da kanca rasśledavańnia.
Dzieci ŭ paniadziełak praciahnuć zaniatki ŭ inšaj navučalnaj ustanovie. Takaja infarmacyja prahučała ŭ prahramie «Kontury» telekanała ANT viečaram 14 lutaha.
Jak paviedamiŭ u intervju prahramie ministr adukacyi Biełarusi Michaił Žuraŭkoŭ, «adnaznačna było vyklučana charčovaje atručvańnie, MNS miarkuje, što heta niejkaje atručvańnie, jakoje pieradajecca praz pavietra». «Što kankretna — jašče pracuje śpiecyjalnaja kamisija», — skazaŭ jon.
U ramkach rasśledavańnia byli pravieranyja raźmieščanyja niepadalok sielhaspradpryjemstvy. Tyja zajavili, što nijakich rabot na palach nie pravodzili navat vosieńniu i ŭciečki chimikataŭ być nie mahło.
Uziatyja analizy nie pakazali ŭździejańnia na arhanizmy dziaciej hazu abo narkotykaŭ. Pry hetym ŭziali proby pavietra ŭ budynku škoły i vakoł jaje, daśledali hlebu, na pavierchach razabrali padłohu, na toj vypadak, kali pad joju znachodziłasia raźlitaja rtuć. Ni adna ź viersij śledstva pakul nie paćvierdziłasia.
Usie proby ź miesca zdareńnia daśledujucca ŭ Dziaržaŭnym kamitecie sudovych ekśpiertyz.
Kryminalnaja sprava ŭzbudžanaja pa fakcie chałatnaści. Padazravanych pakul niama.
U špitali jašče zastajecca adzin školnik. Jaho žyćciu i zdaroŭju ničoha nie pahražaje.