Mierkavany arhanizatar hrupoŭki Kanstancin Viluha i jaje ŭdzielnik KDBist Ihar Karycki. Fota: Siarhiej Hapon, kp.by.
U Minsku za raspaŭsiud narkotykaŭ sudziać 17 čałaviek. Hałoŭny fihurant pa spravie — 31-hadovy Kanstancin Viluha pa mianušcy «Kot», dyrektar «VKM-hrup».
Jak paviedamlaje internet-hazieta Naviny.by, Viluha skončyŭ žurfak BDU. Niekatory čas jon supracoŭničaŭ z hazietaj «SB. Biełaruś siehodnia». Na sajcie «SB» i ciapier možna znajści niekalki jaho publikacyj. Adnak heta, jak i mnohaje inšaje ŭ žyćci, zdajecca, jamu było treba tolki dla naviazvańnia «karysnych suviaziaŭ».
Viluhu zatrymali jašče ŭ listapadzie 2014 hoda. Jon byŭ za rulom «Miersedesa» pradstaŭnickaha kłasa z numarnymi znakam 0101. Abvinavačany lubiŭ darahija mašyny i chvaliŭsia, što na darozie jaho mašynie salutavali supracoŭniki DAI.
Pavodle viersii śledstva, u 2011 hodzie Viluha zapuściŭ sajt LegalMinsk, jaki fihuruje ŭ mnohich kryminalnych spravach, źviazanych ź niezakonnym raspaŭsiudam narkotykaŭ. Pa acency pravaachoŭnikaŭ, pry ŭdałych aptovych prodažach prybytak padsudnaha dasiahaŭ $7 tysiač. I heta — biez uliku roźničnaha prodažu.
Pry vobšuku ŭ Viluhi znajšli paśviedčańnie siabra asacyjacyi pa baraćbie z narkotykami. Złamyśnik pakazvaŭ dakumient pry sustrečy ź milicyjantami, jakim zdavaŭ svaich kankurentaŭ.
Tak jamu ŭdałosia padmiać pad siabie ŭvieś rynak psichatropaŭ ŭ Biełarusi. Paźniej jon arhanizavaŭ filijały i ŭ Rasii. Svajoj viny Kanstancin Viluha nie pryznaje.
Usiaho pa spravie prachodzić 17 abvinavačanych, siarod jakich — dva staršyja ŭpaŭnavažanyja supracoŭniki KDB: Ihar Karycki ŭ Bresckaj vobłaści i Dźmitryj Vieracienski ŭ centralnym aparacie kamiteta. Jany dahetul nie ličacca zvolnienymi.
Jašče adzin abvinavačany – 35-hadovy Kanstancin Dzienisievič. Jon byŭ supracoŭnikam hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS. Z 2012 hoda jon supracoŭničaŭ ź Viluham, a ŭ 2014 zvolniŭsia ź milicyi i kančatkova «ŭładkavaŭsia» na pracu ŭ spajs-kartel.
Astatnija fihuranty ŭ «zvyčajnym žyćci» zajmalisia chto čym. 27-hadovy Jaŭhien Cimochaŭcaŭ – mieniedžar pa prodažach u adnoj sa staličnych firmaŭ, maje vyšejšuju adukacyju.
24-hadovy minčuk Siarhiej Damaškievič, maje siaredniuju śpiecyjalnuju adukacyju, raniej byŭ sudzimy za abarot narkotykaŭ.
24-hadovy tokar z Navapołacka Anton Marozaŭ, užo byŭ sudzimy raniej za narkotyki.
44-hadovy Andrej Pracevič, uradženiec Minskaj vobłaści, maje vyšejšuju adukacyju, žyŭ i pracavaŭ u Maskvie mieniedžeram, nieadnarazova sudzimy, u tym liku za narkotyki.
Marat Bahiel, uradženiec Hrodzienskaj vobłaści, da zatrymańnia taksama žyŭ u Maskvie, raniej sudzimy, maje siaredniuju adukacyju.
31-hadovy minčuk Dźmitryj Haŭryk, raniej byŭ sudzimy za abarot narkotykaŭ, maje siaredniuju adukacyju.
27-hadovy Vital Michałoŭski, žychar stalicy, maje siaredniuju adukacyju, biespracoŭny.
Fiodar Buchaviec — biespracoŭny uradženiec Minska, žyŭ u Padmaskoŭi.
23-hadovy minčuk Maksim Hajduk, maje siaredniuju śpiecyjalnuju adukacyju, taksama nidzie nie pracavaŭ.
Dvoje fihurantaŭ nie byli ŭziatyja pad vartu. Heta žychary Minska 44-hadovy Valery Strabkoŭ i 28-hadovy Fiodar Artamonaŭ.
Na łavie padsudnych taksama dźvie dziaŭčyny. Adna ź ich — 26-hadovaja Iryna Siemianiaka — hramadzianka Rasijskaj Fiederacyi. Inšaja, 24-hadovaja biełaruska Alina Cierahiera, pa viersii śledstva, była kiraŭnicaj złačynnaj hrupy pa raspaŭsiudzie narkotykaŭ. U jaje abaviazki ŭvachodziła raźmierkavańnie abaviazkaŭ pamiž udzielnikami, rehulavańnie cen, rekłama ŭ internecie, upakoŭka narkotyku, ahulnaje administravańnie dziejnaści.
Udzielniki hrupy šyfravali svaju pierapisku, a ŭ apošni čas vykarystoŭvali tolki anłajn-płaciažy.
U červieni 2014 hoda pravaachoŭniki paviedamili, što ŭ Minsku ŭ domie na praśpiekcie Dziaržynskaha zatrymanaja 23-hadovaja dziaŭčyna, jakaja arhanizavała handal novym na toj čas dla Biełarusi narkotykam.
Napeŭna, havorka išła mienavita pra Cierahieru. U arandavanaj kvatery i ŭ aŭtamabili pravaachoŭniki tady vyjavili niekalki kiłahramaŭ zabaronienych rečyvaŭ, a taksama pačak bankaŭskich kartak, try kanvierty z hrašyma, sšytak z buchhałteryjaj, noŭtbuk ź pierapiskaj i ściah Rasii.
Cierahiera, pavodle słoŭ prakurora, taksama ŭdzielničała ŭ stvareńni filijałaŭ «biźniesu» Viluhi ŭ Rasii. U Maskvie AZH uznačalvaŭ niejki Rybko. Viadoma, što jon zatrymany. Vyrašajecca pytańnie ab jaho pieradačy ŭ Biełaruś. Paźniej złačynnuju hrupu ŭ Rasii ŭznačaliŭ Fiodar Buchaviec, jaki ciapier prachodzić abvinavačanym pa nazvanaj kryminalnaj spravie.
Zatrymańnie hrupoŭki možna ličyć vialikim pośpiecham biełaruskich pravaachoŭnikaŭ. Ale ŭdzieł u joj supracoŭnikaŭ śpiecsłužb — heta, adnačasova, vialikaja plama dla ich.
Sud pa spravie praciahvajecca.
