Na Nobieleŭskuju premiju miru 2016 buduć pretendavać 376 kandydataŭ — amal na 100 bolš za ŭstanoŭleny ŭ 2014 hodzie rekord u 278 naminantaŭ. Pra heta havorycca ŭ paviedamleńni, raspaŭsiudžanym Narviežskim nobieleŭskim instytutam.
Sioleta na premiju vyłučanyja 228 čałaviek i 148 arhanizacyj, prytym što ŭ apošnija hady kolkaść arhanizacyj-naminantaŭ, jak praviła, nie pieravyšała 50.
Praces vybaru łaŭreata zojmie siem miesiacaŭ. Jaho imia stanie viadoma tolki ŭ kastryčniku. Zhodna ź isnujučaj tradycyjaj, poŭny śpis naminantaŭ nie abviaščajecca. Tolki pa zakančeńni 50-hadovaha terminu paśla prysudžeńnia ŭznaharod Nobieleŭski fond ličyć mahčymym ahučyć dakumienty, jakija lahli ŭ asnovu pryniataha rašeńnia.
Tym nie mienš, kožny hod źviestki ab vyłučeńni tych ci inšych kandydataŭ niepaźbiežna traplajuć u ŚMI ad arhanizacyj abo asob, jakija vałodajuć pravam naminavańnia. Sioleta siarod patencyjnych łaŭreataŭ, ab vyłučeńni jakich stała viadoma sa ŚMI, fihurujuć były supracoŭnik specsłužbaŭ ZŠA Edvard Snoŭden, vykryvalnik sakretaŭ Pientahona Denieł Ełśbierh, papa Francišak i amierykanski biznesmien Donald Tramp, jaki pretenduje na pasadu prezidenta ZŠA.
Śpis favarytaŭ «nobieleŭskaj honki», jaki štohod składaje dyrektar narviežskaha Instytuta daśledavańnia prablem miru Kryścijan Bierh Charpvikien, pakul što ŭznačalvaje Snoŭden.
Siarod inšych pretendentaŭ na premiju, jakich nazyvaje Charpvikien, ministr enierhietyki ZŠA Ernest Monis i kiraŭnik Arhanizacyi pa atamnaj enierhii Irana Ali Akbar Salechi (ździełka pa iranskaj jadziernaj prahramie), prezident Kałumbii Chuan Manuel Santas i lidar Revalucyjnych uzbrojenych sił Kałumbii Cimaleon Chimienes (čakajecca pahadnieńnie ab spynieńni ŭnutranaha kanfliktu ŭ krainie), hienprakuror Hvatemały Telma Aldana, kiraŭnik Mižnarodnaj kamisii pa baraćbie ź biezzakońniem u Hvatemale Ivan Viełaskies i pravaabaronca Aŭra Elena Farfan (dziejny ŭdzieł u palityčnaj transfarmacyi krainy), a taksama łaŭreat premii Sacharava lekar z Demakratyčnaj respubliki Konha Deni Mukviehie (akazańnie dapamohi achviaram hrupavych zhvałtavańniaŭ u DRK).
Premija miru, jakuju časta nazyvajuć samaj prestyžnaj z uznaharodaŭ, jakija nosiać imia Alfreda Nobiela, u adpaviednaści z zaviaščańniem vybitnaha šviedskaha navukoŭca, prysudžajecca «asobie, jakaja dasiahnuła najbolšych pośpiechaŭ, albo zrabiła bolš za inšych u spravie zhurtavańnia narodaŭ i skaračeńnia kolkaści dziejučych vojskaŭ, a taksama za praviadzieńnie mirnych kanhresaŭ i pryciahnieńnie da ich uvahi». Zrešty, u apošnija hady farmuloŭka bolš čym viekavoj daŭnaści tłumačycca kamitetam dosyć šyroka.
Jak i astatnija nobieleŭskija ŭznaharody, jana ŭručajecca ŭ hadavinu śmierci vialikaha chimika, jaki pamior 10 śniežnia 1896 hoda. Pry hetym, zhodna z apošniaj volaj Nobiela, premija miru, u adroźnieńnie ad čatyroch astatnich uznaharod, jakija aficyjna nosiać jaho imia, uručajecca nie ŭ Stakholmie, a ŭ Osła. U svaim zaviaščańni na hetym nastajaŭ sam navukoviec, jaki pakazaŭ taksama, što rašeńnie ab prysudžeńni premii pavinien prymać kamitet ź piaci čałaviek, pryznačanych narviežskim parłamientam. U jaho pa tradycyi ŭvachodziać vieterany narviežskaj palityki i byłyja kiraŭniki partyj. Da minułaha hoda staršynioj kamiteta byŭ hienieralny sakratar Rady Jeŭropy i były premjer-ministr Narviehii Turbjorn Jahłand.
U 2015 hodzie Nobieleŭskaja premija miru była prysudžanaja tuniskamu «kvartetu» nacyjanalnaha dyjałohu — čatyrom arhanizacyjam, jakija spryjali vyrašeńniu vostraha palityčnaha kryzisu ŭ krainie paśla «jaźminavaj revalucyi» 2011 hoda. Pamier hrašovaha składniku kožnaj z premij u 2015-m, jak i ŭ papiarednija dva hady, byŭ roŭny 8 młn šviedskich kron ($930 tysiač pa biahučym kursie).
