Pres-sakratar prezidenta Ukrainy Śviatasłaŭ Ciehołka apublikavaŭ u «Tvitary» spasyłku na śpis hramadzian Rasii, nibyta jakija zahinuli ŭ chodzie ŭzbrojenaha kanfliktu ŭ Danbasie, składzieny dobraachvotnickaj hrupaj «Hruz 200 z Ukrainy ŭ Rasiju».
U śpisie značycca 2081 čałaviek — jany pieraličany ŭ ałfavitnym paradku, u bolšaści paznačany imia, imia pa baćku, proźvišča, daty naradžeńnia i śmierci (u niekatorych - pryblizna), u šmatlikich - pazyŭny, rodny horad, časam — vajskovaje zvańnie, numar vajskovaha padraździaleńnia, miesca hibieli abo pachavańnia.
«Hruz 200» štomiesiac publikuje novuju redakcyju hetaha śpisu ŭ «Fejsbuku», adnak aficyjny Kijeŭ na dadzienyja vałancioraŭ spasłaŭsia ŭpieršyniu. Apieratyŭna pravieryć hetyja dadzienyja ŭ niezaležnych krynic nie ŭjaŭlajecca mahčymym.
Praź niekalki hadzin spasyłka ŭ tvicie Ciehołka pierastała pracavać, adnak śpis pa-raniejšamu dastupny na staroncy vałancioraŭ ŭ «Fejsbuku».
U pres-słužbie Ministerstva abarony Rasii Ruskaj słužbie Bi-bi-si admovilisia kamientavać hetuju publikacyju, spasłaŭšysia na vychodny dzień, adnak z samaha pačatku ŭzbrojenaha kanfliktu na ŭschodzie Ukrainy Maskva paśladoŭna adprečvała ŭsie abvinavačvańni ŭ tym, što tam vajujuć kadravyja rasijskija vajskoŭcy.
Raniej, 29 lutaha, ministerstva zamiežnych spraŭ Ukrainy zajaviła, što «z momantu pačatku ahresii» na ŭschodzie krainy zahinuła 2600 słužačych ukrainskaj armii, zvyš 9000 atrymali ranieńni. Za miesiac da hetaha prezident krainy Piatro Parašenka aceńvaŭ kolkaść zahinuŭšych u Danbasie ŭkrainskich vajskoŭcaŭ u 2269.
Kijeŭ abvinavačvaje Rasieju ŭ padtrymcy ŭzbrojenych prychilnikaŭ samaabvieščanych respublik u Danbasie, Maskva abviarhaje hetyja abvinavačvańni.
