Ministerstva kultury Biełarusi admoviła niekamiercyjnaj arhanizacyi «Art-siadziba», jakaja papularyzuje nacyjanalnuju kulturu, u supracoŭnictvie ŭ realizacyi šerahu kulturnych prajektaŭ. Pra heta na forumie «Art-siadziby» 18 sakavika ŭ Minsku paviedamiŭ dyrektar arhanizacyi Pavieł Biełavus.
Pavodle jaho słoŭ, raniej siabry «Art-ciadziby» źviarnulisia ŭ Ministerstva kultury z prapanovaj ab`iadnać vysiłki, kab zładzić u miežach Hoda kultury takija imprezy, jak «Dzień vyšyvanki», «Śviata rodnaj movy», «Śpieŭny schod», jakija raniej arhanizacyja pravodziła samastojna.
«Siońnia nam adkazała namieśnica ministra kultury Iryna Dryha. Faktyčna adkazała, što ŭ ministerstva zapłanavanyja svaje mierapryjemstvy i my im nie padychodzim», — zaznačyŭ Biełavus.
Sioleta ŭ kancy studzienia Saviet ministraŭ pastanovaj № 51 zaćvierdziŭ płan mierapryjemstvaŭ, prymierkavanych da Hoda kultury. Da dakumienta, jaki byŭ apublikavany na sajcie ŭrada, prykładaŭsia pieralik mierapryjemstvaŭ, siarod jakich jość «Dzień vyšyvanki». Vykanaŭcami prajekta «Dnia vyšyvanki», jaki zapłanavana pravieści ŭletku, paznačany Biełaruski respublikanski sajuz moładzi i Minharvykankam.
U toj ža čas «Dzień vyšyvanki» — heta fiestyval, kancepcyju i farmat jakoha raspracavaŭ kaardynatar «Art-siadziby» Mikita Broŭka. Pieršyja dva «vyšyvankavyja dni» prajšli ŭ kastryčniku i śniežni 2014 hoda ŭ Minsku pad ehidaj «Art-siadziby» i Asamblei NDA.
Raniej Broŭka adznačaŭ, što nichto ź dziaržaŭnych orhanaŭ abo respublikanskich hramadskich ab`iadnańniaŭ nie źviartaŭsia da siabroŭ arhanizacyi jak da inicyjataraŭ «Dnia vyšyvanki» ŭ Biełarusi z prapanovaj razam pravieści hetaje mierapryjemstva.
