Upieršyniu z 28 krasavika pa 1 maja ŭ staličnym kinateatry «Dom kino» projdzie retraśpiektyva prajekta «Niezaležny pozirk». Kinaalmanach uklučaje najlepšaje z sučasnaha biełaruskaha karotkaha mietra i zaklikany razburyć stereatypnyja ŭjaŭleńni biełarusaŭ pra svoj kiniematohraf.
U dzień premjery ŭ kinateatry vystupiać udzielniki nacyjanalnaha adboru konkursu «Jeŭrabačańnie-2016» — hurt NAVI, čyja pieśnia stała saŭndtrekam da adnaho ź filmaŭ, a karciny prezientujuć aŭtary.
Častku prahramy prajekta składajuć filmy biełaruskaha konkursu kinafiestyvalu «Listapad», jakuju zachodnija i biełaruskija ekśpierty pryznajuć praryvam u biełaruskim kiniematohrafie. Siarod ich — «Sapraŭdnaja amierykanka» Darji Žuk, «ONCBNČA» Maksima Łuščyka, «Adnoj kryvi» Mitryja Siamionava-Alejnikava, «Baba, Vania i kaza» Darji Jurkievič. Nie abydziecca pakaz i biez novych karcin: hledačy ŭbačać historyju kachańnia «Ro i Dž» Jaŭhiena Łytkina i Maksima Małachava, stvoranuju z dapamohaj kraŭdfandynhu, «Bližej, čym ty dumaješ» Arcioma Łobača — prytču ab čałaviečych uzajemaadnosinach, i film pra Čarnobylskuju katastrofu «Ličylnik ščaścia» Ihara Čyščeni, źniaty ŭ ramkach prajekta «Kinosprint».
«Ciapier adbyvajecca praces naradžeńnia novaha biełaruskaha kino, jarkaha, prablemnaha, jakoje vyklikaje žyvy vodhuk. Heta kino pra nas samich. Charakterna, što filmy źniatyja nie na dziaržaŭnaj studyi, a niezaležnymi maładymi režysiorami. Kali my chočam, kab biełaruskaje kino žyło, treba padtrymać našych talenavitych aŭtaraŭ. I pieršaje, što dla hetaha možna zrabić — pryjści na pakaz ich filmaŭ», — kaža kuratar prajekta Mikałaj Łaŭraniuk.
Adna z asablivaściaŭ pakazu — toje, što ŭ im udzielničajuć režysiory roznych kinaškoł. Aŭtary filmaŭ «Niezaležnaha pozirku» atrymali adukacyju nie tolki ŭ Biełarusi, ale i za miažoj. Tak, Darja Jurkievič vučyłasia ŭ Francyi, Darja Žuk — u ZŠA, Mitryj Siamionaŭ-Alejnikaŭ i Maksim Łuščyk — u Rasii, Arciom Łobač — u Polščy.
«Adbor karcin byŭ nie taki ŭžo prosty. Cikavych filmaŭ šmat, i my spadziajomsia, što prajekt adkryje šyrokaj aŭdytoryi novyja imiony ŭ našym kino. Darečy, hladač zmoža prahałasavać za ŭpadabanuju karcinu», — kaža inicyjatar pakazu i hałoŭny režysior kinateatra «Dom kino» Alaksandr Bohdan. Darečy, «Dom kino» užo nie ŭ pieršy raz demanstruje filmy maładych biełaruskich režysioraŭ: z 2006 pa 2013 hod u kinateatry prachodziŭ prajekt «Kinaart pa-biełarusku». Kuratary prajekta «Niezaležny pozirk» taksama raźličvajuć, što pakazy biełaruskaha niezaležnaha kino na vialikim ekranie stanuć rehularnymi.
Pačatak sieansaŭ u 19:00.
Arhanizataram prajekta vystupaje UP «Kinavideaprakat» i Centr vizualnych i vykanalnickich mastactvaŭ «ART Karparejšn».
Śpis filmaŭ, zapłanavanych da pakazu
«Baba, Vania i kaza» (Darja Jurkievič, Biełaruś, Francyja, 2014 h.)
U nievialikaj biełaruskaj vioscy žyćcio baby Sierafimy krucicca vakoł jaje syna, ałkaholika Vani. Nie majučy na svaim baku nikoha, akramia biełaj kazy Mańki, baba Sierafima pačynaje vajnu suprać susiedki Hłašy, jakaja varyć i pradaje samahon u vioscy.
Film byŭ pradstaŭleny na najbujniejšych kinaforumach u Francyi, Litvie, Armienii i inšych krainach, a taksama atrymaŭ śpiecyjalny dypłom na fiestyvali «Listapad»-2014.
«OBNCBNČA» (Maksim Łuščyk, Biełaruś, 2014 h.)
Animacyjnyja-hulniavy film, jaki viartaje hledačoŭ u 90-ja. Encykłapiedyja pierabudoŭčaha dziacinstva nie pakinie abyjakavymi ŭsich, chto pamiataje «bubł-hum» «Turba», bajeviki sa Švarcam i papiarovyja honački.
Jašče adzin chit fiestyvalaŭ SND, na «Listapadzie»-2015 adznačany dypłomam «Za aryhinalnuju stylistyku».
«Adnoj kryvi» (Mitryj Siamionaŭ-Alejnikaŭ, Biełaruś, 2015 h.)
Historyja dvuch rodnych bratoŭ, čyje roznyja pohlady na žyćcio sutyknuli ich u bitvie za svaju praŭdu. Film pryniaŭ udzieł u 25 mižnarodnych kinaforumach i atrymaŭ pryzy ŭ Aŭstryi, Rumynii, Kanadzie, Polščy i Rasii.
«Sapraŭdnaja amierykanka» (Darja Žuk, ZŠA, Biełaruś, Rasija, 2015 h.)
1994 hod. Studentka z byłoha Savieckaha Sajuza niadaŭna pryjechała pa abmienie i žyvie ŭ amierykanskaj siamji. U dzień svajho 17-hodździa, jakoje adznačaje jaje «amierykanskaja siamja», jana traplaje ŭ šerah niazručnych situacyj i sutykajecca z kulturnymi asablivaściami pakul mała viadomaha joj zachodniaha śvietu.
Film byŭ pradstaŭleny na 10 fiestyvalach pa ŭsim śviecie, a na «Listapadzie» atrymaŭ dypłom «Za trapny pohlad biełaruskaha aŭtara na amierykanski siamiejny pobyt».
«Bližej, čym ty dumaješ» (Arciom Łobač, Biełaruś, 2015 h.)
Dziaŭčyna źbiahaje razam sa svaim chłopcam ad baćkoŭ u viaskovuju hłuchmień. Zdavałasia, što tak mahčyma pabudavać pačatak siamiejnych adnosin, ale niečakanaja sustreča źmianiaje ŭsio i adkryvaje sapraŭdnyja namiery kožnaha z hierojaŭ.
«Ličylnik ščaścia» (Ihar Čyščenia, Biełaruś, 2016 h.)
U nievialikim savieckim horadzie ŭ kancy 80-ch hadoŭ žyvie maładaja i ščaślivaja siamja — baćka, maci i syn. Adnojčy baćka źjazdžaje ŭ niečakanuju kamandziroŭku. Maci i syn čakajuć jaho i chvalujucca. I voś baćka viartajecca. Z saboj jon pryvozić dziŭny pradmiet, jaki chłopčyk prymaje za Ličylnik Ščaścia…
Film stvorany ŭ ramkach prajekta «Kinosprint».
«Ro i Dž» (Jaŭhien Łytkin, Maksim Małachaŭ, Biełaruś, 2016 h.)
Film raspaviadaje ramantyčnuju historyju chłopca i dziaŭčyny, jakija volaj losu pavinny znajści darohu adno da adnaho. Film stvorany z dapamohaj kraŭdfandynhu, a saŭndtrekam da jaho stali pieśni biełaruskich hurtoŭ J:MORS i NAVI.
***
Pa ŭsich pytańniach źviartajciesia da kuratara prajekta «Niezaležny pozirk» Mikałaju Łaŭraniuka:
Teł.+375 29 606 58 31 i +375 29 756 75 56
e-mail: [email protected] i [email protected]
