Usie zapeŭnivańni Minska ab biaśpiecy AES, jakaja budujecca, — heta hulnia słoŭ, a nie praktyka, zajaviŭ deputat Jeŭraparłamienta Piatras Aŭštravičus, jaki ŭdzielničaje 22 krasavika ŭ Minsku ŭ mižnarodnaj kanfierencyi pa atamnaj enierhietycy Biełarusi.
Patencyjałam raźvićcia biełaruskaj atamnaj enierhietyki pavinny stać jeŭrapiejskija standarty, ličyć jon, inakš nasielnictva Biełarusi ryzykuje stać «atamna-ekśpierymientalnym narodam».
«Prytrymlivacca postsavieckich standartaŭ — heta jak kročyć pa čarnobylskaj šašy, ja nie chaču vieryć, što Biełaruś hatovaja paviarnuć tudy jašče raz», — skazaŭ jon, adznačyŭšy, što jeŭrapiejskija standarty dajuć inšuju mahčymaść, ale «kanviencyi hruba parušajucca biełaruskim bokam».
Kamientujučy zajavu kiraŭnika MAHATE Jukii Amana ab tym, što ahienctva da 2018 hoda dadatkova praviadzie siem ekśpiertnych misij na Biełaruskaj AES, jon skazaŭ: «My čujem ź Minska, što da 2018 hoda pavinien być uviedzieny ŭ stroj pieršy błok. Kali pryjedzie pieršaja misija? U 2017 hodzie, na ŭźviadzieńnie vianku, jak kažuć? Niešta tut nie sychodzicca. My ž budujem nie fiermu, a mahutnuju atamnuju elektrastancyju, i z hetym žartavać nielha. Uroki Čarnobyla stajać pobač, i Biełaruś, viedajučy pra ŭsio toje, što zdaryłasia, ja dumaju, maje maralnaje prava patrabavać samych vysokich kryteryjaŭ biaśpieki ŭ svajoj krainie».
Na jaho dumku, usie zapeŭnivańni Minska pra biaśpieku stancyi — «heta hulnia słoŭ, a nie praktyka». «Vielmi ryzykoŭna stać achviaraj pijar-infarmavańnia», zajaviŭ jon, adznačyŭšy, što zaprošanyja ekśpierty stanuć «prosta pakaznoj kartkaj».
«Ciapier viadziecca pijar-kampanija, dzie ludziam havorycca adno, a ekśpierty, jakija pahłyblajucca ŭ fakty, viedajuć inšaje», — dadaŭ parłamientaryj.
