Sieryjały stali nieadjemnaj častkaj sučasnaha žyćcia. Ludzi niaredka ŭ sacyjalnych sietkach zadajucca pytańniem, što b pahladzieć novaha, kali skančvajecca ich lubimy sieryjał. «Naša Niva» zrabiła svaju subjektyŭnuju padborku najlepšych sieryjałaŭ hetaha leta.
«Vielmi dziŭnyja rečy» (Stranger Things)
Navukovaja fantastyka, tryler, ZŠA. 1-y siezon
Adznaka na IMDB: 9,1 z 10
Biezumoŭna, najlepšaja premjera hetaha leta. U hłuchoj amierykanskaj pravincyi, štacie Indyjana, robiacca zusim nievytłumačalnyja rečy. Raptoŭna źnikaje 12-hadovy chłopčyk Uił Bajers. Rasśledavańni kožny sam pa sabie pačynajuć siamja Uiła, siabry, palicyja. Kožny ź ich vychodzić na vielmi značnyja ślady ŭ hetaj spravie…
Hałoŭnuju rolu ŭ filmie vykanała słavutaja Vajnona Rajder, ale asabliva varta źviarnuć uvahu na ihru vykanaŭcaŭ dziciačych rolaŭ. Asabliva 12-hadovaj brytanki Mili Bobi Braŭn, jakaja syhrała dziaŭčynku pa imieni Adzinaccać. Vy sapraŭdy budziecie ŭražanyja.
Čamu «Vielmi dziŭnyja rečy» vyklikali taki entuzijazm hledačoŭ? Pa-pieršaje, bo heta vielmi praniźlivy film. Pa-druhoje, hety film poŭny ŭsialakich cytat i pierajmańniaŭ. Jon adnačasova nahadvaje vielmi mnohija filmy i knihi i razam z tym nie padobny ni na što inšaje.
Kali pačniecie hladzieć, to pamiatajcie, što sieryjał zaciahvaje, i što možacie nie zaŭvažyć, jak prahladzieli ŭsie 8 sieryj siezona.
«Mister Robat» (Mr. Robot)
Technatryler, ZŠA. 2-i siezon
Adznaka na IMDB: 8,8 z 10
Elijat Ałdersan — małady kibier-inžynier, jaki pracuje na kampaniju pa infarmacyjnaj biaśpiecy dniom, a ŭnačy zajmajecca chakierstvam, zabiaśpiečvajučy achovu svaich blizkich i prostych žycharoŭ. Elijat pakutuje ad depresii, paranoi i narkazaležnaści, što ŭvieś čas uskładniaje jahonaje žyćcio. Psichaanalityk maładoha chakiera sprabuje daviedacca, jakoj mety choča dasiahnuć padletak, nie zdahadvajučysia pra jahonyja prahramisckija zdolnaści.
Hałoŭny hieroj vieryć u teoryju zmovy. Adnojčy, patrapiŭšy ŭ chakierskuju supołku, jon razam z kamandaj sprabuje ŭzłamać usiu sistemu samaj bujnoj karparacyi, dziela vyzvaleńnia ŭsich žycharoŭ ad kredytaŭ i pazyk…
«Mister Robat» uražvaje niepradkazalnym i zabłytanym siužetam. Kožnaja sieryja ŭjaŭlaje ź siabie asobnuju historyju. Sieryjał spadabajecca prahramistam i anarchistam — imknieńnie ludziej da zmahańnia suprać padmanu karparacyj i ŭłady jarka padkreślivajecca ŭ siužecie.
«Prapaviednik» (Preacher)
Čorny humar, drama, ZŠA. 1-y siezon
Adznaka na IMDB: 8,3 z 10
Adrazu adznačym, što pačynać hladzieć sieryjał varta čałavieku padrychtavanamu ŭ čornym humary. Naprykład, vy hladzieli film «Dohma»? Kali nie ličycie jaho bluźnierskim, to biaryciesia śmieła za «Prapaviednika».
Džesi Kaster źjaŭlajecca prapaviednikam u nievialičkaj techaskaj carkvie. Jahony prychod u zaniapadzie, sam Kaster žłukcić viski i siabruje z vampiram. Jon u kroku ad taho, kab usio heta kinuć i źjechać kudy-niebudź daloka-daloka, ale jaho strymlivaje abiacańnie baćku, a taksama viera ŭ Boha. I, jak toje byvaje ŭ sieryjałach, u adzin cudoŭny dzień usio mianiajecca…
«Prapaviednik» źjaŭlajecca adaptacyjaj adnajmiennaha komiksa. Heta ŭžo nie pieršaja sproba jaho ekranizacyi, ale dakładna samaja ŭdałaja.
«Tyran» (Tyrant)
Drama, ZŠA. 3-i siezon
Adznaka na IMDB: 7,9 z 10
U vydumanaj musulmanskaj dziaržavie Abudzin niečakana pamiraje stary dyktatar. Prezidentam stanovicca jahony syn Džamal al-Fajed. Jahonamu bratu Basamu, jaki adarvaŭsia ad Abudździna, pracavaŭ lekaram u ZŠA, nie padabajucca mietady kiraŭnictva Džamala. Jon maryć pra demakratyčnuju budučyniu svajoj radzimy.
U hetym filmie mnostva adsyłak da padziej našaha času: arabskaja viasna, Isłamskaja dziaržava i h.d. Film dazvalaje krychu zrazumieć miechanizmy dyktarskich dziaržavaŭ i jaki ciažki pierachod ad aŭtarytaryzmu da demakratyi.
«Zavučy» (Vice Principals)
Kamiedyja, ZŠA. 1-y siezon
Adznaka na IMDB: 7,8 z 10
Suvoryja školnyja budni va ŭsioj krasie. U dyrektara adnoj z škoł Ałabamy śmiarotna chvoraja žonka, jon vyrašaje syści z pracy, kab pryśviacić joj čas. Dvoje jahonych namieśnikaŭ — Nił Hembi i Li Raseł — nie biez padstavaŭ miarkujuć, što zojmuć kresła dyrektara. Adnak u apošni momant u škołu zaprašajuć śpiecyjalista zvonku.
Hembi i Raseł, jakija nienavidziać adzin adnaho, zaklučajuć časovy sajuz, kab źvierhnuć novaha dyrektara. Jany časta traplajuć u zusim aniekdatyčnyja situacyi.
Varta adznačyć, što «Zavučy» — heta bieskampramisny i žorstki humar. Mahčyma, nie kožnamu jon prydziecca da spadoby.
«Uejvard Pajns» (Wayward Pines)
Tryler, ZŠA. 2-i siezon.
Adznaka na IMDB: 7,6 z 10
Amataram kultavaha «Tvin Piksa» hety film pavinien spadabacca. Ahient śpiecsłužb Itan Biork pryjazdžaje ŭ haradok Uejvard Pajns, štat Ajdacha. Heta vam nie zrazumiełyja Ńju-Jork i Łos-Anželes, heta zahadkavaja amierykanskaja hłybinka, dzie moža adbycca ŭsio, što zaŭhodna.
Biork vielmi chutka razumieje, što ŭ haradku adbyvajucca strašnyja rečy. Ahient sprabuje źbiehčy, kab nie zahinuć u Ajdacha. Ničoha nie atrymlivajecca — horad z usich bakoŭ akružany ścianoj. Tolki bližej da kancoŭki pieršaha siezona vy zrazumiejecie, u čym tajna hetaha haradka ŭ sosnach.
Siezony atrymalisia vielmi roznyja ŭ svajoj tanalnaści. Pieršy siezon «Uejvard Pajnsa» atrymaŭsia mistyčnym, druhi — žorstkaja antyŭtopija. Praciah budzie.
«Pamiž» (Between)
Navukovaja fantastyka, drama, Kanada. 2-i siezon
Adznaka na IMDB: 5,9 z 10
U małym haradku niečakana pačynajuć pamirać usie, chto starejšy za 21 hod. Žycharami zastajucca tolki dzieci i padletki. Horad uziaty ŭ abłohu ludźmi z aŭtamatami, ułady pałochajucca, što zahadkavy virus moža pierapaŭźci na astatniuju častku krainy.
Siužet amal jak u nobieleŭskaha łaŭreata Žaze Saramahu. U jahonych «Ślepacie» i «Pierabojach u śmierci» ludzi taksama pastaŭlenyja ŭ ekstremalnyja ŭmovy. U takija momanty z kožnaha piersanaža pačynaje leźci jahonaja sutnaści: chtości stanovicca hierojem, chtości — niahodnikam.
Jak vyžyvać u śviecie, kali ty viedaješ, što dzień 22-hodździa stanie apošnim?