Kiraŭnik biełaruskaj delehacyi na Alimpijadzie ŭ Rya Maksim Ryžankoŭ nazvaŭ viełahonščyka Vasila Kiryjenku hałoŭnym rasčaravańniem Alimpijady.
Pra heta pamočnik prezidenta Biełarusi pa sporcie zajaviŭ paśla vystupleńnia biełarusak u hrupavych praktykavańniach pa mastackaj himnastycy, paviedamlaje Priessboł.
«Mabyć, hałoŭnaje — viełahonščyk Kiryjenka, — skazaŭ Ryžankoŭ. — Pry ŭsich jaho tytułach vyjści i skazać, maŭlaŭ, moj kankurent źniaŭsia za dva etapy da kanca «Tur de Frans», bo rychtavaŭsia da Alimpijady, a ja nie źniaŭsia… I kali, maŭlaŭ, mianie nahnali, to źnikła matyvacyja…
My čakali ad jaho značna bolšaha. Jak i ad lohkaatletaŭ.
Nichto nie kazaŭ, što ŭsim 36 spartoŭcam treba zavajavać miedali. Ale chacia b vykłaścisia na sto adsotkaŭ! Adnak jany nie pakazali navat tych vynikaŭ, ź jakimi adabralisia na Alimpijadu. Nie kažučy ŭžo pra asabistyja rekordy abo najlepšyja pakazčyki ŭ siezonie. Vieryli i ŭ strałkoŭ. Jany mahli vystupić bolš upeŭniena. Zaŭsiody byli pobač, stralali ŭdała, ale na apošnich stadyjach łamalisia».
Vasil Kiryjenka, nahadajem, syšoŭ z dystancyi ŭ hrupavoj honcy, a ŭ honcy z raździelnym startam zaniaŭ 17-je miesca.
Ź lohkaatletaŭ zavajavaŭ miedal tolki Ivan Cichan u kidańni mołatu (srebra). Strałki ŭznaharodaŭ naohuł nie zdabyli.
Usiaho Biełaruś zavajavała ŭ Rya dzieviać miedaloŭ.
Adzin załaty (Uładzisłaŭ Hančaroŭ — batut),
čatyry siarebranyja (Maryja Mamašuk — volnaja baraćba, Ivan Cichan — mołat, Darja Navumava i Vadzim Stralcoŭ — ciažkaja atletyka),
čatyry bronzavyja (Džavit Hamzataŭ — hreka-rymskaja baraćba, Ibrahim Saidaŭ — volnaja baraćba, Alaksandra Hierasimienia — płavańnie, Marharyta Machnieva, Maryna Litvinčuk, Nadzieja Lapieška i Volha Chudzienka ŭ zajeździe bajdarki-čaćviorki).
