Śpiavačka Iryna Darafiejeva, jakaja źjaŭlajecca kandydatam u deputaty pa staličnaj Staravilenskaj akruzie № 105, spadziajecca realizavać siabie ŭ palitycy, jak Ronald Rejhan, Arnold Švarcenehier, Taisija Pavalij i Maryja Kažeŭnikava. Pra heta jana zajaviła ŭ svaim pieradvybarnym televystupleńni, pakazanym 26 žniŭnia ŭ efiry telekanała «Biełaruś 3».
Darafiejeva adznačyła, što joj časta zadajuć pytańnie, navošta śpiavačka idzie ŭ deputaty. «Padobnyja pytańni zadavalisia šmatlikim tvorčym dziejačam, jakija paśpiachova realizavali siabie ŭ palitycy. Heta i prezident ZŠA akcior Ronald Rejhan, akcior i hubiernatar Kalifornii Arnold Švarcenehier, deputat i ŭkrainskaja śpiavačka Taisija Pavalij, deputat Dziaržaŭnaj dumy Rasii aktrysa Maryja Kažeŭnikava i mnohija inšyja. Dumaju, u Hod kultury heta aktualna i ŭ našaj krainie», — skazała jana.
Darafiejeva ličyć, što hałoŭnym kryteryjem adboru kandydataŭ u deputaty pavinna stać ich zdolnaść «prymać takija zakony, jakija buduć adpaviadać intaresam ŭsiaho hramadstva».
Pavodle słoŭ śpiavački, z samaha pačatku svajoj tvorčaj dziejnaści jana adčuvaje vielizarnuju asabistuju adkaznaść za raźvićcio rodnaj krainy, adradžeńnie i prymnažeńnie nacyjanalnaj kultury.
Darafiejeva zajaviła, što ŭ jaje sfarmiravałasia «jasnaja i vyraznaja prahrama dziejańniaŭ — dziejańniaŭ ad žyćcia», jakuju jana choča realizavać, kali stanie deputatam parłamienta.
Kandydat taksama «hłyboka pierakananaja», što «nacyjanalnyja tradycyi, mova i kultura — heta toj padmurak, na jakim umacoŭvajucca identyčnaść i adzinstva nacyj», jaki farmiruje vobraz Biełarusi, u tym liku za miažoj. Pry hetym jana abiacaje spryjać raźvićciu miecenactva, jak asobnaha samastojnaha krynicy finansavańnia dla papularyzacyi nacyjanalnaj kultury i historyi, zachavańniu «toj spadčyny, jakaja nam zastałasia ad pradziedaŭ spakon viakoŭ».
Akramia taho, Darafiejeva, kali stanie deputatam, maje namier zasiarodzicca na raźvićci pradprymalnictva, jakoje źjaŭlajecca «asnovaj inavacyjnaha patencyjału» u akruzie.
«Ja razumieju, jakuju adkaznaść niasie dziaržava pierad hramadzianami. Ale mnohaje zaležyć ad nas samich. Treba raźvivać i ŭdaskanalvać sistemu zvarotnaj suviazi orhanaŭ ułady z hramadzianami, stymulavać raźvićcio orhanaŭ miascovaha samakiravańnia», — ličyć Darafiejeva.
