U Mścisłavie rajsaviet uchvaliŭ rašeńnie ŭviekaviečyć imia biełaruskaha drukara Piatra Mścisłaŭca. Jaho imiem nazvali centralnuju płošču. Akramia taho, u staroj častcy rajcentru dźvium vulicam viernuć histaryčnyja nazvy: Karmelickaja i Pirahoŭskaja.
U rajsaviecie skazali, što centralnaja płošča pierad rajvykankamam nazvy dahetul nia mieła, ale na joj staić pomnik Piatru Mścisłaŭcu.
«Tamu rajsaviet i zaćvierdziŭ nazvu płoščy jak płošča imia Piatra Mścisłaŭca. Heta znakavaja histaryčnaja asoba nia tolki dla Mścisłava, ale dla ŭsioj Biełarusi», — skazaŭ staršynia rajsavietu Śviatasłaŭ Kusaŭ.
Pavodle surazmoŭcy, u histaryčnaj častcy horadu buduć pieranazvanyja dźvie vulicy. Adnoj ź ich, što kala Karmelickaha kaścioła, viernuć nazvu Karmelickaja. Jašče adnu, jakaja nasiła imia Ŭryckaha, nazavuć, jak raniej, Pirahoŭskaj. Śviatasłaŭ Kusaŭ udakładniŭ, što pakul histaryčnyja nazvy viernuć tolki častkam vulic u starym horadzie. Kančatkova imia Ŭryckaha z mapy horadu jašče nia źniknie.
«Mścisłaŭ — vielmi staražytny horad. I jak jość, naprykład, u Talinie — stary Talin, a ŭ Miensku — stary Miensk, dyk čamu b nia być i staromu Mścisłavu. Uviekaviečvańnie imia Piatra Mścisłaŭca i viartańnie histaryčnych nazvaŭ vulicaŭ adbyvajecca nia tolki ŭ miežach padrychtoŭki horadu da «Dažynak». Heta adzin z krokaŭ pa nadańni horadu statusu «Horad-muzej pad adkrytym niebam»», — skazaŭ Śviatasłaŭ Kusaŭ.
Piotar Mścisłaviec razam ź Ivanam Fiodaravym (Fiedarovičam) zasnavaŭ u 1564 hodzie ŭ Maskoŭskim kniastvie drukarniu i vydaŭ u joj pieršuju ŭ Maskovii drukavanuju knihu «Apostał». Padziaki, adnak, nie dačakaŭsia. Razam ź Fiodaravym vymušany byŭ ratavacca ŭciokami na radzimu — u Vialikaje Kniastva Litoŭskaje. Tut jon zasnavaŭ novuju drukarniu i praciahnuŭ spravu Skaryny. Drukar naradziŭsia ŭ Mścisłavie.
Staršynia Tavarystva biełaruskaj movy Aleh Trusaŭ, jaki taksama rodam sa Mścisłava, vitaje rašeńnie ŭładaŭ ušanavać imia Piatra Mścisłaŭca. Jaho i Ivana Fiodarava rupliviec biełaruščyny nazyvaje biełaruskimi patryjotami.
«Ich u Maskvie ledźvie nie zabili, i kali jon razam ź Fiodaravym uciok u Vialikaje Kniastva, jany ŭdvaich šmat čaho biełaruskaha nadrukavali. Tamu jany našy patryjoty. Mścisłaviec i Fiodaraŭ, jon ža Fiedarovič, — siabry, i jany abodva ź Biełarusi», — kaža Aleh Trusaŭ.
«Na płoščy, jakoj nadajuć imia Mścisłaŭca, niekali źbiralisia pastavić pomnik Leninu, — kaža staršynia TBM. — Ale pa niezrazumiełych pryčynach ułady hetaha nie zrabili. I Mścisłaŭ zastavaŭsia adzinym horadam, u jakim nie było pomnika Leninu i płoščy imia Lenina».
Jak zhadvaje Aleh Trusaŭ, zamiest pomnika Leninu pastavili pomnik Piatru Mścisłaŭcu.
«Jaho adkryli na Dzień biełaruskaha piśmienstva i druku. Takim čynam, u horadzie stała dva pomniki drukaru. Adzin napaŭlehalna my pastavili jašče ŭ saviecki čas. Pomnik hety staić pad jezuickim kaściołam, i aformleny jon jak sadova-parkavaja fihura. U čas, kali stavili pieršy pomnik, Mścisłavam kiravaŭ duža prahresiŭny staršynia rajkamu partyi Katuškin. Jon šmat čaho dazvalaŭ biełaruskaha rabić u Mścisłavie».
Nieŭzabavie Mścisłaŭ prymie abłasny festyval pracaŭnikoŭ siała «Dažynki-2016». Pry padrychtoŭcy da jaho paciarpieli niekatoryja pomniki architektury. Tak, zusim pobač z centralnaj płoščaj rajcentru budaŭniki natknulisia na staryja sutareńni. Pavodle znaŭcaŭ daŭniny, heta častka handlovych radoŭ. Pakolki sutareńni nia mieli statusu historyka-kulturnaj kaštoŭnaści, ich zasypali. Na zasypanaj placoŭcy zrabili stajanku.
