Aktyvisty niezarehistravanaj arhanizacyi «Małady front» pačali kapać akopy ŭ lesie pad vioskaj Rudnia-Sponickaja niedaloka ad Vietki, za 25 km ad rasijskaj miažy.
Praź niekalki chvilin paśla pačatku akcyi źjaviłasia hrupa leśnikoŭ, da ich dałučylisia nieviadomyja ludzi ŭ cyvilnym. Nieŭzabavie pryjechali dźvie mašyny z uzbrojenymi supracoŭnikami milicyi ŭ broniekamizelkach, taksama źjavilisia pažarnyja. Ahułam na dvaich maładafrontaŭcaŭ — 14 čałaviek.
Milicyja skłała pratakoły na ŭdzielnikaŭ akcyi: adzin za «parušeńnie cełasnaści podściłu i žyvoha nadhlebavaha pokryva», druhi za nieadpaviednaść normam aptečki ŭ mašynie aktyvistaŭ.
Aktyvisty zatrymanyja da vyśviatleńnia abstavinaŭ: kiraŭnik rajona vyklikaŭ apieratyŭnuju hrupu, bo ŭ mašynie adnaho z udzielnikaŭ akcyi, lidara «Maładoha Frontu» Źmitra Daškieviča znajšli strajkbolny aŭtamat — idzie pravierka mulažu.
Daškievič zajaviŭ milicyi, što nie razumieje rasijskaj movy. Dla razmovy ź im milicyja vyklikała ŭ les nastaŭnika biełaruskaj movy.
***
Akcyja MF źviazanaja z ahresijaj Rasii adnosna Ukrainy: na dumku jaje ŭdzielnikaŭ, biełarusam taksama treba być hatovymi da adporu rasijskaj ahresii. Za 76 km ad miesca praviadzieńnia akcyi znachodzicca rasijskaje miastečka Klincy, kudy ź niadaŭniaha času ściahvajucca rasijskija vojski.
