Sud u Rastovie-na-Donie vynies prysud 4 krymskim musulmanam 7 i 5 hadoŭ. Pra heta paviedamlaje Krym. Realii.
Zhodna z rašeńniem suda, sievastopalec Rusłan Ziejtułajeŭ, jakoha rasiejskija ŭłady nazyvajuć arhanizataram jačejki «Chizb ut-Tachryr», asudžany da siami hadoŭ kałonii ahulnaha režymu, Fierat Sajfułajeŭ, Rustem Vaitaŭ i Nury Prymaŭ atrymali pa piać hadoŭ papraŭčaj kałonii taksama ahulnaha režymu.
Prysud byŭ abvieščany za 15 chvilin.
Na pasiadžeńni 31 žniŭnia Rusłan Ziejtułajeŭ zaklikaŭ sud pryniać spraviadlivaje rašeńnie. Jon padkreśliŭ, što rašeńnie ŭ dačynieńni da ŭsich čatyroch krymskich musulman było pryniata da taho, jak ich etapavali ŭ Rastoŭ.
Advakat Emil Kurbiedzinaŭ nazvaŭ absurdnymi viersii śledstva i pakazaŭ na adsutnaść dokazaŭ abvinavačvańnia krymčan.
Pres-sakratar MZS Ukrainy Marjana Bieca nazvała rašeńnie suda cyničnym. «Vykazvajem pratest u suviazi ź niezakonnymi prysudami. Patrabujem ad RF spynić represii suprać krymskich tataraŭ», — napisała jana.
Sud nad Rusłanam Ziejtułajevym, Rustemam Vaitavym, Nury Prymavym i Fieratam Sajfułajevym pačaŭsia ŭ červieni. Ich aryštavali zimoj 2015 hoda ŭ Sievastopali i abvinavačvajuć va ŭdziele ŭ isłamskaj arhanizacyi «Chizb ut-Tachryr».
Pradstaŭniki mižnarodnaj isłamskaj palityčnaj arhanizacyi «Chizb ut-Tachryr» nazyvajuć svajoj misijaj abjadnańnie ŭsich musulmanskich krain ŭ isłamskim chalifacie, ale jany adprečvajuć terarystyčnyja mietady dasiahnieńnia hetaha i kažuć, što adčuvajuć niespraviadlivy pieraśled u Rasii. Viarchoŭny sud Rasii zabaraniŭ «Chizb ut-Tachryr» u 2003 hodzie, uklučyŭšy ŭ śpis abjadnańniaŭ, nazvanych «terarystyčnymi».
Akramia Rasiei hetaja arhanizacyja jak terarystyčnaja zabaronienaja va Uźviekistanie, Kazachstanie, Kitai i inšych azijackich i afrykanskich krainach. U Niamieččynie dziejnaść «Chizb ut-Tachryr» abmiežavanaja z-za abvinavačvańniaŭ u antysiemityźmie. Va Ukrainie i ŭ bolšaści krain Zachadu jana moža dziejničać lehalna.
