Supracoŭniki Śledčaha kamiteta pravodziać pravierku pa fakcie suicydu rodnych bratoŭ u Navapołacku, paviedamiła aficyjny pradstaŭnik USK pa Viciebskaj vobłaści Śviatłana Sacharava.
Pieršaje samahubstva adbyłosia 9 vieraśnia: rachunki z žyćciom źvioŭ 17-hadovy navučeniec prafiesijna-techničnaha vučylišča №89 Navapołacka, małady čałaviek byŭ znojdzieny paviešanym.
Praz čatyry dni — 13 vieraśnia — paviesiŭsia jaho 25-hadovy starejšy brat. «Pieršy fakt byŭ zafiksavany ŭ Brasłaŭskim rajonie, kudy małodšy brat adpraviŭsia na praktyku. Napiaredadni jon nie vykazvaŭ suicydalnych namieraŭ», — skazała Sacharava.
Jana taksama paviedamiła, što śledčyja apytali znajomych navapałačanina i jaho adnahrupnikaŭ: usie raspaviali, što za dzień da trahiedyi jon pavodziŭ siabie jak zvyčajna i nie byŭ čymści zasmučany. Adnak, pa słovach Sacharavaj, na staroncy zahinułaha va «Ukantakcie» byŭ znojdzieny zapis, zrobleny za dzień da samahubstva, jaki možna traktavać jak paviedamleńnie pra mahčymy namier skončyć z saboj.
Druhi suicyd adbyŭsia 13 vieraśnia, praź dzień paśla pachavańnia chłopca. Cieła jaho starejšaha brata, jaki pryjechaŭ na pachavańnie, było znojdziena ŭ Navapołacku, kala doma, dzie pražyvaje siamja.
Sacharava raspaviała, što 25-hadovy małady čałaviek u razmovach sa svajakami vykazvaŭ namiery ździejśnić suicyd. «Jon kazaŭ paśla pachavańnia, što takaja sproba budzie», — skazali ŭ SK. Pa słovach pradstaŭnika USK, zaraz śledčyja pracujuć sa svajakami zahinułych i ich znajomymi, kab vyjavić pryčyny, jakija pryviali da trahiedyi.
