Budaŭnictva Biełaruskaj atamnaj elektrastancyi nie budzie prypyniena, zajaviła pieršy namieśnik ministra pryrodnych resursaŭ i achovy navakolnaha asiarodździa Ija Małkina na pres-kanfierencyi 14 vieraśnia ŭ Minsku pa vynikach druhoha raŭnda dvuchbakovych kansultacyj biełaruskich i litoŭskich ekśpiertaŭ pa pytańniach budaŭnictva BiełAES.
Takim čynam čynoŭnica pa prośbie litoŭskaha žurnalista prakamientavała raspačatuju 23 žniŭnia ŭ Litvie palityčnuju kampaniju pa spynieńni budaŭnictva Biełaruskaj AES.
«Biełaruski bok nieadnarazova zaklikaŭ litoŭskija ŭłady i pradstaŭnikoŭ dziaržaŭnych orhanaŭ Litvy pačać kanstruktyŭny dyjałoh, — skazała Małkina. — Na siońniašni dzień, ja dumaju, vidavočna, što Respublika Biełaruś nie prypynić budaŭnictva Biełaruskaj atamnaj stancyi. Ja nie viedaju takich matyvaŭ, jakija b pasłužyli dla pačatku takoha pracesu».
Na dumku namieśnika kiraŭnika Minpryrody, zamiest takoha rodu kanfrantacyi pradstaŭnikam ministerstvaŭ pryrody, enierhietyki i achovy zdaroŭja dźviuch krain było b pravilniej pačać «kanstruktyŭny dvuchbakovy prafiesijny dyjałoh dla taho, kab sumiesna manitoryć situacyju ŭ zonie budaŭnictva atamnaj stancyi».
Litoŭski bok, skazała čynoŭnica, pahadziŭsia praciahnuć kansultacyi, u ramkach jakich abmiarkoŭvajucca pałažeńni dvuchbakovaha pahadnieńnia pamiž pryrodaachoŭnymi ministerstvami Biełarusi i Litvy. Pavodle jaje słoŭ, heta «toj sihnał, jaki śviedčyć pra mahčymaść pačatku takoha dyjałohu».
«Biełaruski bok nie tolki zajaŭlaje pra hatoŭnaść takoha dyjałohu, my, u tym liku fizična, hatovyja jaho praciahvać, — adznačyła Małkina. — My hatovyja pracavać z pradstaŭnikami litoŭskich adpaviednych słužbaŭ u ramkach tych prymalnych miechanizmaŭ, dvuchbakovych kamisij, ekśpiertnych kansultacyj i hetak dalej, jakija buduć zručnyja, u tym liku i litoŭskamu boku, kab sapraŭdy źniać toj ažyjataž, jaki isnuje ŭ nasielnictva z-za budaŭnictva Biełaruskaj atamnaj stancyi».
Jana zaklikała ŭsich žycharoŭ Litvy ŭ cełym i Vilni ŭ pryvatnaści padniać pierad svaimi orhanami dziaržaŭnaha kiravańnia pytańnie pra mahčymaść takoha dyjałohu. «Chopić havaryć palityčnymi łozunhami, davajcie pracavać na ŭzroŭni prafiesijanałaŭ», — zajaviła Małkina.
