Kala 100 vałancioraŭ vyjšli na hienieralnuju ŭborku «Čystaja płyń», kab prybrać ad śmiećcia bierah raki Śvisłač. Takaja akcyja prachodzić užo piaty hod zapar, a za arhanizacyju hetaha ekałahičnaha mierapryjemstva ŭziałasia kampanija «Alivaryja», prajekt «Meta 99» i vałanciory.
«Za 5 hadoŭ praviadzieńnia našaj akcyi «Čystaja płyń» było sabrana bolš za 900 kh śmiećcia siłami amal 300 vałancioraŭ, — kaža mieniedžar pa karparatyŭnych kamunikacyjach AAT «Piŭzavod Alivaryja» Ała Mačałava. — Ale dla nas važna navat nie toje, kolki kiłahramaŭ śmiećcia było sabrana za čas akcyj. Značna važniej pryciahvać uvahu da hetaj unikalnaj pryrodnaj terytoryi ŭ miežach horada, pavyšać ekałahičnuju piśmiennaść, pryvivać zvyčku paasobna źbirać adchody i naohuł kłapacicca pra ekałohiju rodnaha horada».
Śvisłač źjaŭlajecca adnoj z ekałahična kaštoŭnych rek Minska, bo tut vodzicca 15 vidaŭ ryby.
Pierad pryborkaj trenier pa eka-varkaŭcie Alaksiej Kuprakoŭ pravioŭ treniroŭku pa tym, jak pravilna źbirać śmiećcie.
Butelki, ježa, pakunki — asnoŭnaje śmiećcie na bierazie Śvisłačy, dy j nie tolki tam. Chacia časam atrymlivajecca znachodzić sapraŭdnyja rarytety — pakryški ad traktara, vykinutyja ŭnitazy.
Za 5 hadzin akcyi sumiesnymi siłami było sabrana 400 kh śmiećcia. Usie ŭdzielniki akcyi ŭ jakaści padarunka zmahli prakacicca na katary pa Śvisłačy, a ekskursavod padčas płavańnia raspavioŭ pra nieviadomyja staronki historyi Čyžoŭki.
