Namieśnik ministra finansaŭ Biełarusi Maksim Jermałovič u kułuarach forumu «Pašyrajučy haryzonty: inviestycyi, finansy, raźvićcio» raskazaŭ «Našaj Nivie», kali biełaruskaja ekanomika pazbavicca zaležnaści ad čužych enerhanośbaŭ i ciažaru stratnych dziaržaŭnych pradpryjemstvaŭ.
Razmovu ź Jermałovičam my pačali z pytańnia, u čym jon bačyć kaniec biełaruskaj zaležnaści ad pastavak rasijskich enerhanośbitaŭ.
«My majem mahčymaść samastojna zamiaščać tuju zaležnaść, pra jakuju vy havorycie, — skazaŭ Jermałovič, — tamu raźvićcio nie tolki IT, ale ahułam małoha i siaredniaha biznesu — heta najvyšejšy pryjarytet dziaržavy».
Adrazu ž havorka pierajšła na toje, što navat pry paśpiachovym raźvićci pryvatnych i małych inicyjatyvaŭ vialikaja dola ich padatkaŭ idzie nie na raźvićcio, a na datacyi stratnych pradpryjemstvaŭ.
Namieśnik ministra skazaŭ, što siońnia admovicca ad vialikich pramysłovych hihantaŭ dziaržava nie moža, bo jany stvarajuć bazis usioj ekanomiki, tamu pieradusim treba zadumacca pra los małych stratnych pradpryjemstvaŭ i razumnaha raźmierkavańnia dziaržaŭnych resursaŭ — jany musiać iści ŭ najbolš prybytkovyja śfiery.
Ale ŭ čym pryčyna taho, što adnyja ŭ Biełarusi zarablajuć miljardy, a inšyja nie zdolnyja navat pracavać u nul?
«Sacyjalny faktar — u hetym asnoŭnaja prablema, jakaja strymlivaje raźvićcio i ruch napierad, — skazaŭ Jermałovič, majučy na ŭvazie pracoŭnyja kadry, jakija nie adpaviadajuć zapytam sučasnaha rynku. — Čałaviek pavinien mieć rabotu, dach nad hałavoj — heta bazavy pryncyp usioj našaj ekanomiki i sistemy dziaržpadtrymki. I časam sacyjalnaja skiravanaść upłyvaje na efiektyŭnaść taho ci inašaha biznesa. I ja liču, što najhałoŭnaja zadača va ŭsioj siońniašniaj paviestcy ekanamičnych pieraŭtvareńniaŭ — heta vybudoŭvańnie takoj sistemy padtrymki, jakaja budzie dazvalać ludziam z adnaho, mienš efiektyŭnaha siektara ekanomiki, pierachodzić u inšy, paśpiachovy. Razumieńnie taho, jak heta rabić, jość. Ciapier my vypracoŭvajem zakanadaŭčyja miery dla udaskanalvańnia miechanizmaŭ pierapadrychtoŭki čałavieka, kali jon užo nie znachodzić sabie prymianieńnia na zvykłym miescy pracy ci nie atrymlivaje tam žadanych dachodaŭ. Heta praces musić być sproščany».
Namieśnik ministra taksama dadaŭ, što najpraściejšy šlach — heta syści ŭ biznes, skarystaŭšysia kredytami, jakija vydajuć biełaruskija banki pry padtrymcy mižnarodnych instytutaŭ.
Ale i dla tych ludziej, jakija ŭžo va ŭzroście i nie majuć śmiełaści ci zdolnaściaŭ dla adkryćcia svajoj spravy, taksama buduć stvoranyja ŭmovy dla pierachodu sa źbiadniełych pradpryjemstvaŭ.
«Pa-pieršaje, kali čałavieku 40 hadoŭ, to jamu treba samomu razumieć, kudy iści, — my ž kožnaha za ruku nie voźmiem i nie pieraviadziem z adnaho pradpryjemstva na inšaje, chacia heta zadača maksimum. Kali jon nie moža pa svajoj śpiecyjalnaści zarablać, jon pavinien pierapadrychtavacca z ulikam jahonych navykaŭ. Padrychtoŭka zojmie ad 3 da 6 miesiacaŭ, kab pierajści ŭ inšy siektar ekanomiki. Ale tut vielmi važna, kab usio heta padmacoŭvałasia inviestycyjami, kab vybudoŭvałasia taja ekanamičnaja baza, kab čałaviek pierachodziŭ na bolš vysoki zarobak, heta našaja meta», — skončyŭ dumku Jermałovič.
