Asvoić učastak ź vidam na Drazdy i novuju rezidencyju źbiralisia daŭno. Jašče stajali karpusy, ale ŭžo raspracoŭvaŭsia prajekt zabudovy, pa jakim prapanoŭvałasia raźmiaścić tut siaredniepaviarchovaje žyllo «palepšanych spažyvieckich jakaściaŭ».
Śvietłyja kvadraty — źniesienyja ŭčastki fabryki, za Śvisłačču bližej da praśpiekta — Drymłend, Pałac niezaležnaści, płošča Ściaha. U vierchnim levym kucie — Drazdy. Jandeks.Karty.
Zakazčykam na terytoryju tady vyznačyli UKB Centralnaha rajona. Potym hetyja funkcyi pieradali DVA «Minskbud» i kampanii «Trajpł». Apošniaja ŭ 2012 hodzie praviała konkurs na najlepšuju kancepcyju zabudovy. Pieramahła praca architektaraŭ z Łatvii. Praduhledžvałasia, što terytoryja budzie padzielenaja kanałam na dźvie zony — zakrytuju elitnuju i małapaviarchovuju publičnuju. Ale da realizacyi sprava nie dajšła.
U kastryčniku 2015 hoda byŭ abjaŭleny konkurs inviestaraŭ. Im prapanoŭvali na terytoryi fabryki — a heta kala 60 hiektaraŭ — budavać elitny rajon na 350 tysiač kvadratnych mietraŭ: niekalki dzieviacipaviarchovak, kłubnyja małapaviarchovyja damy, taŭnchaŭsy. A u zabieśpiačeńnie zabudovy infrastrukturaj — uźvieści kacielniu, škołu, dziciačy sad, palikliniku, prahułačnyja zony. I źnieści vialiki haražny masiŭ. Ukłaścisia ŭ taki «załaty» prajekt na fonie kryzisu achvotnych, vidać, nie znajšłosia.
Takim chacieli bačyć rajon: bližej da Śvisłačy elitnyja taŭnchaŭsy, bližej da darohi — dzieviacipaviarchoviki papraściej. Vid z boku praśpiekta mierkavałasia nia paharšać vysokapaviarchovaj zabudovaj.
Ciapier častku terytoryi byłoj ptuškafabryki — placoŭku amal u 36 hiektaraŭ — vystavili na aŭkcyjon «dla budaŭnictva abjekta «Šmatfunkcyjanalny kompleks u rajonie vuł. Navavilenskaj». Z abciažarańniaŭ ukazanyja: znos budynka kanalizacyjnaj pompavaj stancyi № 14 pa vuł. Navavilenskaj, 25a i pakryćcio ŭ biudžet Minska strat, paniesienych na vyzvaleńnie (uklučajučy znos) placoŭki byłoj ptuškafabryki. Znosu haražoŭ niama — terytoryja pad haražami akazałasia za miežami prapanavanaj pakupnikam placoŭki.
Pačatkovy košt łota — 16 miljonaŭ 204 tysiačy rubloŭ — krychu bolš za 8 miljonaŭ dalaraŭ. Paŭdzielničać u aŭkcyjonie mohuć jak jurydyčnyja asoby, tak i indyvidualnyja pradprymalniki. U aŭkcyjonie dapuskajecca ŭdzieł na baku pakupnika kansalidavanych udzielnikaŭ — dvuch i bolš indyvidualnych pradprymalnikaŭ, jurydyčnych asob.
«Asnoŭnyja patrabavańni pa prajektavańni i budaŭnictvie abjekta i ŭmovy pradastaŭleńnia ziamielnaha ŭčastka paznačanyja ŭ ziamielna-kadastravaj i inšaj dakumientacyi, padrychtavanaj dla praviadzieńnia aŭkcyjonu», — paviedamlajecca na sajcie Minskaha haradskoha centra nieruchomaści, arhanizatara tarhoŭ.
«U składzie šmatfunkcyjanalnaha kompleksu paznačanaja žyłaja šmatkvaternaja zabudova z poŭnym kompleksam abjektaŭ hramadskaha absłuhoŭvańnia. Ahulnaja płošča zabudovy — da 310 tysiač kvadratnych mietraŭ, ź ich žylla — 199 tysiač kvadratnych mietraŭ», — udakładnili ŭ Minskim haradskim centry nieruchomaści.
Hetyja normy kažuć pra toje, što zabudoŭščyku, jaki nabudzie hety ŭčastak, naŭrad ci ŭdasca pabudavać novy vysakaščylny i vysokapaviarchovy mikrarajon. 199 tysiač kvadratnych mietraŭ — heta dva dziasiatki šmatpadjezdnych dzieviacipaviarchovak ci try-čatyry dziasiatki čatyroch-siamipaviarchovych damoŭ. Heta značyć, novy rajon budzie kali nie elitnym, to całkam kamfortnym.
