Paŭhadzinnaja mastackaja stužka «Dušy miortvyja» Viktara Krasoŭskaha zavajavała hałoŭny pryz šostaha fiestyvalu novaha biełaruskaha kino Bulbamovie — załatuju bulbinu, jak lepšy hulniavy film. Cyrymonija ŭznaharodžańnia adbyłasia 22 kastryčnika ŭ staličnym art-kinateatry «Tytan».
Lepšaj animacyjnaj stužkaj žury pryznała karcinu Ivana Hapijenki «Dzieci budučaha śpiać». Hetaja ž rabota atrymała ŭznaharodu za lepšy huk. Pryz hladackich simpatyj prysudžany karcinie «Vianok» Paŭła Niadźviedzia.
Animacyjnaja praca «Łambiersiek i dajarka» Atatola Tadorskaha, a taksama mastackaja karcina «Dvaccaćšasnaccať» Andreja Kryvickaha i Dźmitryja Rachoŭskaha ŭdastoilisia śpiecyjalnych pryzoŭ žury.
Šosty fiestyval novaha biełaruskaha kino Bulbamovie adkryŭsia ŭ Minsku ŭviečary 21 kastryčnika. U prahramu kinaforumu byli ŭklučanyja 24 mastackija, dakumientalnyja i animacyjnyja kinakarciny.
Prahramny dyrektar fiestyvalu Maksim Žbankoŭ na adkryćci fiestyvalu nazvaŭ cudam toj fakt, što hety kinaforum pravodzicca ŭžo šosty raz. «Ale samy hałoŭny cud i bahaćcie ŭ našaj situacyi heta novyja aŭtary i publika. Ja ŭdziačny ŭsim vam za toje, što vy robicie nasupierak usim niespryjalnym abstavinam. Žadaju ŭsim nam kreatyŭnaj niazhody, asabistaj hodnaści i pazityŭnaha nastroju», — skazaŭ jon.
Kinafiestyval Bulbamovie byŭ inicyjavany ŭ 2011 hodzie hrupaj biełaruskich kiniematahrafistaŭ i kinakrytykaŭ jak alternatyva dziaržaŭnym kinafiestyvalam, jakija pravodziacca ŭ Biełarusi. Jaho zasnavalnikam i dyrektaram źjaŭlajecca polski fiłołah i žurnalist biełaruskaha pachodžańnia Januš Haŭryluk.
Da 2014 hoda kinafiestyval pravodziŭsia ŭ Varšavie, u 2015 hodzie pierajechaŭ u Minsk.
