Hamialčanin padčas svarki vykinuŭ z akna byłuju žonku na vačach u dziaciej. Muž i žonka svarylisia z-za taho, što paśla razvodu nie zmahli padzialić trochpakajovuju kvateru, piša kp.by.
Kanflikt u homielskaj siamji raźvivaŭsia daŭno. I ŭviečary ŭ niadzielu, 23 kastryčnika, skončyŭsia trahiedyjaj: na vačach maleńkich dačok padčas skandału z byłoj žonkaj 36-hadovy mužčyna vyšturchnuŭ jaje z akna kvatery na siomym paviersie. Pa darozie ŭ balnicu žančyna pieražyła kliničnuju śmierć, ale miedyki zaviali serca.
Žančyna pamierła ŭ balnicy dniom u paniadziełak.
Susiedzi da niadaŭniaha času ličyli siamju vielmi dobraj. U žančyny była rabočaja śpiecyjalnaść, muž pracavaŭ kiroŭcam aŭtobusa, nie piŭ. Jany razam katalisia na rolikach, na rovarach — čatyry siamiejnyja rovary da hetaha času stajać u padjeździe.
Prablemy pačalisia kala hoda nazad - u muža źjaviłasia inšaja žančyna. Muž i žonka pačali łajacca, susiedzi čuli kryki. Muž padniaŭ ruku na žonku: adnojčy jana prybiehła da susiedziaŭ, paprasiła pieranačavać — jana była źbitaja. Potym byŭ sud, mužčynu asudzili za naniasieńnie lohkich cialesnych paškodžańniaŭ žoncy. Nieŭzabavie paśla suda ŭ vieraśni hetaha hoda jany raźvialisia.
Ale žyć praciahvali razam, u trochpakajovaj kvatery ź dziećmi. Kvatera znachodzicca ŭ novabudoŭli ŭ novym mikrarajonie na ŭskrainie Homiela. Mienavita žyllo i było pryčynaj svarki muža i žonki, śćviardžajuć ich susiedzi.
Pa słovach susiedziaŭ, u apošni čas žyli ci ledź nie ŭpiacioch — były muž pryvioŭ u chatu svaju novuju kachanuju.
- Jany kvateru nie mahli padzialić. Jon tudy i novuju pasiju pryvodziŭ, — kaža adna z znajomych muža i žonki.
U toj viečar susied pajšoŭ vyhulvać sabaku i pačuŭ, što kala padjezda niechta chrypić. Padbieh, paznaŭ susiedku, vyklikaŭ «chutkuju» i milicyju. Tam skazali, što ŭžo vyjechali, bo ich vyklikaŭ sam muž.
Zatym susiedzi ŭbačyli mužčynu na leśvičnaj kletcy, užo ŭ kajdankach. Vonkava toj byŭ spakojny. Kali jany, ahałomšanyja, spytali, što zdaryłasia, skazaŭ: «Ja jaje vykinuŭ z akna».
U kvatery pry hetym znachodzilisia zapałochanyja dzieci, dziaŭčynki 13 i 9 hadoŭ. Zatym, chutčej za ŭsio, ich zabrała babula.
Pavodle papiaredniaj infarmacyi, mužčyna byŭ ćviarozy. Ciapier jon znachodzicca ŭ izalatary. U paniadziełak artykuł byŭ pierakvalifikavany na zabojstva z asablivaj žorstkaściu.