Ranicaj 4 listapada čytačy TUT.BY paviedamili pra dziŭny ruch hruzavika la ŭvachoda ŭ Dom urada ŭ Minsku - nibyta kiroŭca kružyŭ na vialikaj chutkaści ad pomnika Leninu da płoščy Miaśnikova. Milicyja pierakryła ruch mašynie i zatrymała mužčynu, jaki ŭ hety čas mocna łajaŭsia.
Pa słovach vidavočcaŭ, zatrymańnie prachodziła dosyć žorstka, sam kiroŭca vykrykvaŭ abrazy ŭ adras prezidenta. Na jaho nadzieli kajdanki i niejki čas pakinuli stajać na kaleniach. Paśla taho jak mužčynu advieźli ŭ adździeł milicyi, jaho mašyna jašče prykładna hadzinu zastavałasia stajać kala płoščy.
Paźniej pres-słužba HUUS paviedamiła, što milicyja zatrymała parušalnika PDR, jaki «paškodziŭ darožny znak u rajonie płoščy Niezaležnaści».
«U 8.45 zatrymany 38-hadovy minčuk, jaki, kirujučy aŭtamašynaj DAF (hruzavik), hruba parušyŭ šerah Praviłaŭ darožnaha ruchu. Dziakujučy pilnym i prafiesijnym dziejańniam milicyjantaŭ jon byŭ zatrymany. Padčas spynieńnia supraćpraŭnych dziejańniaŭ kiroŭca vioŭ siabie nieadekvatna, niecenzurna łajaŭsia», — paviedamlaje pres-słužba staličnaj milicyi.
Adznačajecca, što padčas ahladu mašyny śledča-apieratyŭnaja hrupa Maskoŭskaha RUUS znajšła ŭ sałonie mietaličnuju kurylnuju lulku z rečyvam raślinnaha pachodžańnia zialonaha koleru, a taksama blašanku z anałahičnym rečyvam. Znachodki adpraŭlenyja na ekśpiertyzu.
U dačynieńni da kiroŭcy supracoŭnikami adździeła DAI Maskoŭskaha RUUS składzienyja administracyjnyja pratakoły pa artykułach 18.12, 18.14, 18.17, 18.22 KoAP Biełarusi.
Vyśvietliłasia, što hety hramadzianin raniej užo traplaŭ u pole zroku pravaachoŭnikaŭ — z 2008 pa 2016 hod 19 razoŭ pryciahvaŭsia da administracyjnaj adkaznaści za parušeńnie PDR i pracoŭnaha zakanadaŭstva.
Pravodzicca dalejšaja pravierka, paviedamili ŭ HUUS.
