Asvoić terytoryju ptuškafabryki imia Krupskaj źbiralisia daŭno. Niekalki hadoŭ tamu raspracoŭvaŭsia prajekt zabudovy, pa jakim prapanoŭvałasia raźmiaścić tut siaredniepaviarchovaje žyllo «palepšanych spažyvieckich jakaściaŭ», bo pobač Drazdy. Ale inviestaraŭ, hatovych asvoić taki ŭčastak, nie znajšłosia. Tady ziamlu padzialili i pałovu vystavili na aŭkcyjon. Da siońniašniaha dnia zachoŭvałasia intryha — dźvie kampanii chacieli nabyć «załatuju ziamlu».
Takim horad chacieŭ by bačyć zabudovu hetaj ziamli: bližej da Drazdach małapaviarchovaj, dalej — vyšej.
Ale tarhi nie adbylisia. Adzin z udzielnikaŭ adklikaŭ zajaŭku. U vyniku adzinamu zajaŭniku łot dastaŭsia pa canie, pavialičanaj na 5%. Heta značyć, za 17,01 młn rubloŭ.
Pieramožca, pavodle danych udzielnikaŭ rynka, — kampanija, jakaja buduje žyllo pad kantrolem TDA «Ajron».
Na 31 hiektary zabudoŭščyku dazvolać uźvieści žyłuju šmatkvaternuju zabudovu (199 tysiač kvadratnych mietraŭ) abmiežavanaj pavierchavaści z poŭnym kompleksam abjektaŭ hramadskaha absłuhoŭvańnia. Hetyja normy kažuć pra toje, što zabudoŭščyku naŭrad ci ŭdasca pabudavać novy vysakaščylny mikrarajon. 199 tysiač kvadratnych mietraŭ — heta dva dziasiatki šmatpadjezdnych dzieviacipaviarchovikaŭ ci try-čatyry dziasiatki čatyroch-siamipaviarchovych damoŭ. Heta značyć, učastak pradadzieny pad novy rajon na 8—10 tysiač žycharoŭ, jaki budzie kali nie elitnym, to całkam kamfortnym.
Cana ŭ vyhladzie 17,01 młn rubloŭ — tolki bačnaja častka ajśbierha vydatkaŭ, kažuć zabudoŭščyki. Pieramožcu treba budzie kampiensavać horadzie «rasčystku» terytoryi. Źnieści budynak pompavaj stancyi. Mohuć čakać i inšyja nie apisanyja ŭ dakumientach siurpryzy, źviazanyja ź sietkami, infrastrukturaj i h.d.
Jak patłumačyli arhanizatary aŭkcyjonu, Minski haradski centr nieruchomaści, 50% koštu łota zajaŭnik pavinien apłacić na praciahu 10 dzion, jašče 50% (z dazvołu Minharvykankama) moža płacić u rasterminoŭku.
Nahadajem, TDA «Ajron» u apošnija hady pazicyjanuje siabie nie jak zabudoŭščyka, a jak deviełapiera, zakazčyka budaŭnictva, jaki taksama vykonvaje funkcyi techničnaha nahladu ŭ budaŭnictvie.
