Ministerstva adukacyi i kampanija Microsoft Biełaruś padpisali miemarandum ab supracoŭnictvie. Podpisy pad dakumientam pastavili ministr adukacyi Michaił Žuraŭkoŭ i kiraŭnik pradstaŭnictva Microsoft u Biełarusi Anton Miakišaŭ.
Hety dakumient — adzinaje pahadnieńnie na padpisku pa prahramie licenzavańnia EES (Enrollment for Education Solutions). Pa pahadnieńni ŭstanovy daškolnaj, ahulnaj siaredniaj, prafiesijnaj i vyšejšaj adukacyi, a taksama dziaržaŭnyja orhany kiravańnia adukacyjnymi ŭstanovami atrymajuć dostup da nieabchodnych servisaŭ, prahram i praduktaŭ, jakija dajuć mahčymaść ukaranić elektronny dakumientaabarot i padklučycca da prajekta «Elektronnaja škoła».
Jak adznačyŭ Anton Miakišaŭ, heta padpisańnie adkryvaje mahčymaść dla ŭstanoŭ sistemy adukacyi atrymlivać ŭsie vyhady vykarystańnia šyrokaha śpiektra licenzijnych viersij praduktaŭ Microsoft.
Kožny supracoŭnik ustanovy adukacyi, jakaja skarystajecca ŭmovami pahadnieńnia, atrymaje mahčymaść ustanavić pakiet Office 365 na 5 mabilnych i 5 stacyjanarnych pryład. Vučni i ich baćki taksama zmohuć ustanavić prahramnyja pradukty na damašnija kampjutary, smartfony i płanšety. Pryčym razmova idzie pra pryłady, jakija pracujuć na asnovie luboj apieracyjnaj sistemy.
Ministr adukacyi Michaił Žuraŭkoŭ adznačyŭ, što padpisańnie dakumienta źjaŭlajecca pradaŭžeńniem raboty z kampanijaj Microsoft u napramku stvareńnia «Elektronnaj škoły» i ŭ cełym elektronnaha Ministerstva adukacyi. Pa pahadnieńni da novaj sistemy źnižak buduć padklučany nie tolki škoły, ustanovy praftechadukacyi, VNU, ale i inšyja ŭstanovy, jakija ŭvachodziać u sistemu adukacyi.
Apłata pravodzicca ŭ vyhladzie štohadovych płaciažoŭ. Na asnoŭnyja płatformiennyja, i nie tolki, pradukty dla vyšejšych navučalnych ustanoŭ dziejničaje źnižka 45%, dla škoł — 70%. Sumarnaja źnižka na niekatoryja prahramnyja pradukty dasiahaje 95% ad kamiercyjnaj cany.
Što datyčycca pytańnia, ci abaviazkova škołam vykarystoŭvać pieravahi pahadnieńnia, ministr prakamienciravaŭ: «Sama škoła abo ŭniviersitet buduć vyznačać, što i ŭ jakim abjomie nabyvać. My tolki budziem rekamiendavać».
Udzielniki cyrymonii adznačyli, što śviet pieražyvaje fazu ličbavaj transfarmacyi. Absalutna kožny biźnies, kožnaja ekanomika transfarmujecca, a infarmacyjnyja technałohii źjaŭlajucca jadrom takoj transfarmacyi. I kab biełaruskaja ekanomika była bolš kankurentazdolnaj, kab jana mahła na hetym rynku dastojna vystupać, jaje važna zabiaśpiečvać jakasnymi kadrami. Značyć, sučasnym školnikam i studentam važna dać mahčymaść atrymlivać jakasnuju adukacyju z vykarystańniem usich najnoŭšych srodkaŭ. Tamu Microsoft šmat inviestuje mienavita ŭ sistemu adukacyi.
