Nabližajecca da zaviaršeńnia samaja hučnaja sprava ab raspaŭsiudžvańni narkotykaŭ u Biełarusi. 14 listapada prakuror Aleh Bujlankoŭ nazvaŭ terminy źniavoleńnia, da jakich, na dumku abvinavačvańnia, varta pryhavaryć abvinavačvanych.
Dla klučavoha fihuranta — Kanstancina Viluhi — jon zapytaŭ 20 hadoŭ pazbaŭleńnia voli. Dla byłoha supracoŭnika KDB Dźmitryja Vieracienskaha — 15 hadoŭ, jaho kalehi Ihara Karyckaha — 14 hadoŭ, dla byłoha apieratyŭnika hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj (HUBAZiK) Kanstancina Dzienisieviča — 14 hadoŭ pazbaŭleńnia voli. Akramia hetaha prakuror prosić sud pazbavić Karyckaha i Vieracienskaha zvańnia majora KDB, a Dzienisieviča — zvańnia padpałkoŭnika milicyi. Dla dziaŭčyny Viluhi Iryny Siemianiaki, jakaja ź`iaŭlajecca hramadziankaj Rasii, dziaržabvinavaŭca taksama zapytaŭ surovaje pakarańnie — 18 hadoŭ pazbaŭleńnia voli.
Bujlankoŭ nastojvaje, što vina Viluhi i inšych abvinavačvanych dakazanaja. Pa viersii śledstva, Kanstancin Viluha ŭ 2011 hodzie stvaryŭ mahazin LegalMinsk pa prodažy kurylnych sumiesiaŭ i psichatropaŭ i kiravaŭ im da 4 listapada 2014 hoda, pakul jaho nie zatrymali. Jak ličyć abvinavačvańnie, hałoŭny fihurant i jaho saŭdzielniki zarabili na narkotykach prykładna 1,6 młn dołaraŭ (900 tysiač — u Biełarusi i 700 tysiač — u Rasii).
Zadačy Viluhi, pavodle słoŭ prakurora, byli nastupnyja: arhanizacyja dastaŭki tavaru z Rasii, zachoŭvańnie i raspaŭsiudžvańnie spajsaŭ, raźmierkavańnie ŭ nastupnym atrymanaha prybytku. Hałoŭny fihurant spravy, na dumku prakurora, uciahnuŭ u złačynny biźnies Vieracienskaha, Karyckaha i Dzienisieviča, jakija zabiaśpiečvali praviadzieńnie ekśpiertyz (praviarali, ci ŭvachodziać rečyvy dla spajsaŭ u śpis zabaronienych), a taksama dapamahali Viluhu likvidavać kankurentaŭ.
Akramia taho, jak vynikaje z abvinavačvańnia, Viluha załučyŭ u złačynnuju hrupu i inšych abvinavačanych, u pryvatnaści Alinu Cierahieru, jakaja ŭ nastupnym ŭznačaliła «narkabiźnies» u Minsku. Uletku 2014 hoda jana była zatrymanaja z partyjaj zabaronienaha tavaru. Jaje prakuror prosić pryhavaryć da 19 hadoŭ pazbaŭleńnia voli, chłopca Cierahiery Jaŭhiena Cimachoŭcava — da 16 hadoŭ.
Pavodle infarmacyi śledstva, svaje filijały ŭ Viluhi byli i ŭ Rasii. Na łavie padsudnych try čałavieki, jakija, pa viersii śledstva, pradavali spajsy ŭ RF, — heta Fiodar Buchaviec (jaho prakuror prosić pryhavaryć da 12 hadoŭ pazbaŭleńnia voli), Marat Bahiel (da 10 hadoŭ) i Andrej Pracievič (da 7 hadoŭ pazbaŭleńnia voli).
Surovaha pakarańnia, na dumku Bujlankova, zasłuhoŭvajuć i inšyja abvinavačvanyja, jakija mieli dačynieńnie da raspaŭsiudžvańnia spajsaŭ u Biełarusi: Maksim Hajduk (jaho prakuror prosić pryhavaryć da 15 hadoŭ pazbaŭleńnia voli), Vital Michajłoŭski (da 16 hadoŭ), Dźmitryj Haŭrykaŭ (da 17 hadoŭ), Anton Marozaŭ (da 13 hadoŭ), Siarhiej Damaškievič (da 12 hadoŭ pazbaŭleńnia voli, a taksama prymusovaha lačeńnia ad narkamanii).
Prakuror padkreśliŭ, što abvinavačanyja vykarystoŭvali sučasnyja technałohii — bieskantaktavy prodaž narkotykaŭ, ananimnyja znosiny ŭ internecie, anłajn-raźliki, u tym liku ŭ bitkoinach. «Im nie treba było peckać ruki i vychodzić na vulicu — dastatkova było vyjści ŭ internet. Jany rekłamavali dyzajnierskija narkotyki jak lehalnyja. Ale lehalnymi jany nazyvalisia nie tamu, što nie nieśli škodu, a tamu, što byli jašče nie zabaronienyja», — zajaviŭ dziaržabvinavaŭca.
Na łavie padsudnych — dva čałavieki, jakich abvinavačvali ŭ zachoŭvańni narkotykaŭ biez mety raspaŭsiudžvańnia, jany znachodziacca na svabodzie. Heta Valeryj Strabkoŭ (dla jaho prakuror zaprasiŭ dva hady pazbaŭleńnia voli i prymusovym lačeńniem ad narkamanii) i Fiodar Artamonaŭ (jamu dziaržabvinavaŭca prosić pryznačyć čatyry hady abmiežavańnia voli biez nakiravańnia ŭ papraŭčuju ŭstanovu).
Bolšaść abvinavačanych, u tym liku Kanstancin Viluha, svajoj viny nie pryznali. Jany nastojvajuć na tym, što pradavali tolki dazvolenyja na toj momant rečyvy. Bolšaść nie viedali adzin adnaho da pačatku kryminalnaj spravy, a tamu nie mahli, na ich dumku, uvachodzić u adnu złačynnuju hrupu.
Abvinavačvanyja jašče vystupiać z apošnim słovam u sudzie. Zaraz u sprečkach vystupajuć abaroncy abvinavačvanych.
