Alaksandr Łukašenka moža pajści na praviadzieńnie refierendumu, sumiaściŭšy jaho ź miascovymi vybarami, jakija adbuducca nie paźniej za 20 lutaha 2018 hoda. Pra heta zajaviŭ staršynia Partyi BNF Alaksiej Janukievič 3 śniežnia na pasiadžeńni sojma arhanizacyi, paviedamlaje BiełaPAN.
Pavodle jaho słoŭ, ułady i raniej razhladali scenaryj refierendumu, a Libieralna-demakratyčnaja partyja vystupiła ź inicyjatyvaj jaho praviadzieńnia, kab lišni raz nahadać pra siabie.
Z adnaho boku, adznačyŭ Janukievič, Łukašenka adčuvaje dla siabie pahrozu z boku Rasii, a tamu choča vykarystać čas praviadzieńnia rasijskaj prezidenckaj kampanii, kali ŭvaha da Biełarusi budzie asłablena. «Za hety čas jon moh by vyrašyć svaje ŭnutranyja pytańni na šmat hadoŭ napierad, kab paźbiehnuć mahčymych pravakacyj z boku Kramla», — adznačyŭ palityk.
Adnačasova, ličyć Janukievič, Łukašenka moh by z dapamohaj refierendumu naładzić adnosiny z Zachadam. «Rana ci pozna ad Łukašenki zapatrabujuć realnych spraŭ pa sistemnych źmienach u krainie. Tamu ŭ pakiet pytańniaŭ, jakija vynosiacca na refierendum, možna ŭklučyć pytańni, jakija dazvolili b Zachadu zapluščyć vočy na toje, što adbyvajecca, pahadzicca na akazańnie finansavaj dapamohi», — skazaŭ jon.
Siarod takich pytańniaŭ — admiena śmiarotnaj kary abo ŭviadzieńnie maratoryja na jaje, źmiena vybarčaj sistemy, pavieličeńnie terminaŭ paŭnamoctvaŭ prezidenta i parłamienta.
Janukievič taksama zajaviŭ, što ŭ listapadzie aktyvizavałasia rasijskaja prapahanda i dziejnaść prarasijskaj piataj kałony ŭ Biełarusi. Tak, pravodziacca kanfierencyi, vydajucca knihi, jakija nosiać antybiełaruski charaktar.
Pavodle słoŭ palityka, heta robicca z metaj ekanamičnaha i palityčnaha nacisku na Łukašenku, dla taho kab «abrezać jamu šlachi na Zachad, jašče bolš pryviazaŭšy da Rasii».
Pry hetym Janukievič źviarnuŭ uvahu na toje, što raźvićcio dyjałohu z Zachadam prachodzić na fonie praciahu represij. «Mahčyma, jany bolš miakkija, ale nosiać bolš masavy charaktar, — skazaŭ lidar Partyi BNF. — Tamu dyjałoh choć i važny, ale jon pavinien być abumoŭleny, pavinna być darožnaja karta. Biełaruskija ŭłady taksama pavinny rabić kroki nasustrač».
