Paśla pratestaŭ žycharoŭ budaŭnictva fizkulturna-azdaraŭlenčaha kompleksu kala Cnianskaha vadaschovišča ŭ Minsku zakansiervavanaje, paviedamiŭ kaardynatar hramadskaj kampanii «Hienpłan — dla minčan» Dzianis Kobrusieŭ.
Jak vynikaje z adkazaŭ kamiteta architektury i horadabudaŭnictva Minharvykankama i RUP «Hałoŭdziaržbudekśpiertyza» na zapyt inicyjatyŭnaj hrupy miascovych žycharoŭ, budaŭnictva nie prosta prypynienaje, a zakansiervavanaje i pa prajekcie prypynienaje dziejańnie dziaržekśpiertyzy.
«Voś i zadajucca žychary Zialonaha Łuha pytańniem — navošta treba było tak śpiašacca z budaŭnictvam hetaha FAKa, vysiakać drevy, ryć katłavan, kali staić jon zaraz zakansiervavany na niavyznačany termin i nikomu nie patrebny? Navošta hety abjekt vynieśli ŭ składzie prajekta detalovaha płanavańnia na hramadskaje abmierkavańnie, kali kinutaja budplacoŭka FAKa zieŭraje ranaj na bierazie Cnianskaha vadaschovišča? Niezrazumieła i ź jakoj pryčyny budaŭnictva zakansiervavanaje: ci ŭ zabudoŭščyka skončylisia srodki, abo čakajuć rašeńnia ŭładaŭ? Kamu heta vyhadna i chto za heta adkaža?» — zaŭvažyŭ aktyvist.
Jon nahadaŭ, što ciapier zakančvajecca hramadskaje abmierkavańnie horadabudaŭničaha prajekta detalovaha płanavańnia (PDP) terytoryi žyłoj siadzibnaj zabudovy vioski Cna (uniasieńnie źmienaŭ z uklučeńniem terytoryi ŭ miežach vulic Šyrokaja — Padolskaja — Kalcova — Sobinava — 4-ty zavułak Kalcova — zachodniaja miaža žyłoj zony — paŭnočnaja miaža zony — 1-šy zavułak Kalcova), arhanizataram jakoha źjaŭlajecca administracyja Savieckaha rajona Minska. Prajektam praduhledžana raźmiaščeńnie fizkulturna-azdaraŭlenčaha kompleksu z tenisnymi kortami ŭ rajonie vulic Mirašničenki — Varapajeŭskaja ŭ łandšaftna-rekreacyjnaj zonie. «Choć PDP jašče tolki ŭ pačatku svajho šlachu pa ŭzhadnieńni i śćviardžeńni, adnak placoŭku dla FAKa pačali rasčyščać značna raniej — jašče ŭ krasaviku 2016 hoda, čym vyklikali hnieŭ i abureńnie miascovych žycharoŭ», — adznačyŭ Kobrusieŭ.
Viasnoj 2016 hoda minčanie sabrali 3.500 podpisaŭ suprać raźmiaščeńnia FAKa ŭ vodaachoŭnaj zonie Cnianskaha vadaschovišča i pieradali ich u Minharvykankam, Kamitet dziaržaŭnaha kantrolu i Administracyju prezidenta, ale «tady mierkavańnie ludziej było praihnaravanaje i praź miesiac pačałasia budoŭla». Adnak u lipieni inśpiekcyjaj Departamienta pa kantroli i nahladzie za budaŭnictvam pa Minsku było vyniesienaje pradpisańnie ab prypynieńni samavolnaha budaŭnictva. Z taho momantu budoŭla była spynienaja, ź jaje prybrali budaŭničy kran.
Žychary Zialonaha Łuha sprabavali daviedacca ŭ kamitecie architektury i horadabudaŭnictva pryčynu prypynieńnia raniej vydadzienaha im zaklučeńnia, a zaadno i aktualny skład hetaha abjekta, bo na praciahu paŭhoda ŭ prajekcie FAKa źjavilisia pakoi dla rełaksacyi i jašče adzin bar. Taksama stała viadoma, što zabudoŭščyk chacieŭ unieści ŭ pieršapačatkovy prajekt źmieny, dadaŭšy tudy haściavy dom. «Adnak pa niezrazumiełaj pryčynie kamitet usialak chavaje infarmacyju i prapanuje pytańni pa składzie FAKa adrasavać zabudoŭščyku — ZAT» Eryja», — zaznačyŭ kaardynatar hramadskaha ruchu.
«Na siońnia hramadskaje abmierkavańnie jašče nie skončanaje, adnak suprać zaćviardžeńnia i realizacyi PDP vykazvajuć svajo mierkavańnie nie tolki žychary Zialonaha Łuha, ale i nieabyjakavyja da dalejšaha losu Cnianskaha vadaschovišča žychary inšych rajonaŭ stalicy. Pry hetym abureńnie minčan i najbolšuju kolkaść pytańniaŭ vyklikaje mienavita FAK», — padkreśliŭ aktyvist.
