Staršynia Minharvykankama Andrej Šorac na sustrečy ź inicyjatyŭnaj hrupaj žycharoŭ Sielhaspasiołka 7 śniežnia paabiacaŭ «uziać tajm-aŭt» u vysiečcy dreŭ u staličnym skviery Kotaŭka, paviedamiŭ siabra inicyjatyŭnaj hrupy Viktar Bartaševič.
Pavodle jaho słoŭ, kiraŭnik Minharvykankama zamiest zapłanavanych 15 chvilin hutaryŭ z aktyvistami kala dźviuch hadzin. «My za hety čas zmahli danieści ŭsio, što chacieli raskazać», — adznačyŭ Bartaševič.
U pieršuju čarhu aktyvisty raskazali Šorcu pra siońniašnija sutyčki miascovych žycharoŭ z rabotnikami «Zielanbuda» i «Harramaŭtadara», kali aktyvisty sprabavali pieraškodzić vysiečcy dreŭ u skviery pad budaŭnictva kaścioła. Niekatoryja z žycharoŭ u chodzie baraćby z supracoŭnikami nazvanych kamunalnych pradpryjemstvaŭ atrymali siniaki i traŭmy. «My skazali, što ŭsio zafiksavana na videa i jość tamu dokazy. Ja byŭ ździŭleny, što ŭ Šorca heta infarmacyja nie vyklikała nijakaj čałaviečaj reakcyi. Jon siadzieŭ i słuchaŭ dalej», — adznačyŭ aktyvist.
Juryst ekałahičnaha tavarystva «Zialonaja sietka» Maryna Dubina, jakaja taksama prysutničała na sustrečy, paviedamiła kiraŭniku Minharvykankama, što im było admoŭlena ŭ hramadskaj ekałahičnaj ekśpiertyzie karekciroŭki płana detalovaha płanavańnia (PDP) Sielhaspasiołka. U prajekcie praduhledžana pašyreńnie vulicy M.Bahdanoviča, dzie płanujecca budaŭnictva treciaj linii mietro, znos pryvatnaha siektara, budaŭnictva šmatfunkcyjanalnych kompleksaŭ, žyłych šmatkvaternych budynkaŭ, abjektaŭ sacyjalnaj infrastruktury, a taksama zabudova zialonych zon: skviera Kotaŭka i na zavułku Kryłoviča.
Razam z Šorcam na sustrečy z aktyvistami byŭ jaho pamočnik, pradstaŭniki administracyi Savieckaha rajona i architektar karekciroŭki PDP Sielhaspasiołka Zoja Zabaroŭskaja. «Jana sprabavała abaranić svoj prajekt i kazała, što ŭsio zakonna, a my ŭkazvali, što mnohaje ŭ prajekcie niezakonna, asabliva parušeńnie rehłamientu hienpłana, zhodna ź jakim zabaroniena luboje kapitalnaje budaŭnictva ŭ skviery Kotaŭka», — raskazaŭ siabra inicyjatyŭnaj hrupy. Pavodle jaho słoŭ, u adkaz na zaŭvahi Šorac skazaŭ, što «tam ža stanie pryhoža i dobraŭparadkavana». Miž tym raniej u skviery byli łaŭki i jon byŭ akružany kustoŭjem, ciapier usio heta źnikła, adznačyŭ jon.
«U vyniku kiraŭnik Minharvykankama paabiacaŭ uziać tajm-aŭt, paabiacaŭ, što zaŭtra nichto tam pracavać nie budzie. My spytali, kolki heta praciahniecca, na što jon adkazaŭ: «Pakul nie vyvuču usie vašy dakumienty i zvaroty». Choć usio, što my jamu dali, možna pračytać za paŭhadziny. Kolki tajm-aŭt praciahniecca, ja nie viedaju, ale Šorac, vidać, zrazumieŭ, što tam niešta nie tak. Tak što raboty nie buduć vieścisia ŭ Kotaŭcy chacia b zaŭtra», — padkreśliŭ Bartaševič.
Pavodle jaho słoŭ, taksama aktyvisty prapanavali Šorcu pryznać, što hramadskaje abmierkavańnie karekciroŭki PDP, jakoje prajšło raniej, nie adbyłosia, pakolki ŭ kamisiju nie ŭvajšli pradstaŭniki inicyjatyŭnaj hrupy žycharoŭ rajona, a ŭvajšli kiraŭniki bujnych firmaŭ-zabudoŭščykaŭ. «Jon spakojna prareahavaŭ i prapanavaŭ pakinuć zvarot. Kiraŭnik rajonnaj administracyi zapeŭniŭ Šorca, što ŭsio zakonna», — adznačyŭ aktyvist.
Na pytańnie ab płanach pa dalejšych dziejańniach i prośbu prakamientavać infarmacyju pra toje, što nibyta vysiečka spyniena pa zvanku z Administracyi prezidenta, Bartaševič adkazaŭ: «Ja zaŭtra pahladžu, ci budzie vykonvacca abiacańnie Šorca. My jamu skazali i pra hety zvanok, na što jon adkazaŭ, što, kali b takoje daručeńnie było, jon by pieršym pra heta daviedaŭsia».
Jak paviedamlałasia raniej, z 8 listapada pa 2 śniežnia administracyja Savieckaha rajona Minska praviała hramadskija abmierkavańni karekciroŭki płana detalovaha płanavańnia Sielhaspasiołka. Miascovyja žychary ličać, što płan nieabchodna viarnuć na dapracoŭku i pradstavić dapracavany prajekt na paŭtornaje abmierkavańnie.
Abščynie «Rymska-katalickaja parafija śviatych apostałaŭ Piatra i Paŭła i śviatoha Jaŭhiena de Mazieno» ŭ kastryčniku vydali novy dazvoł na praviadzieńnie budaŭniča-mantažnych rabot u skviery Kotaŭka ŭ Sielhaspasiołku.
Miascovyja žychary i ekołahi ŭpeŭnieny, što budaŭnictva kaścioła ŭ skviery — parušeńnie pałažeńniaŭ rehłamientu hienpłana. Pakolki Kotaŭka zialonaja zona, pa rehłamiencie hienieralnaha płana i płana detalovaha płanavańnia stalicy jana nie moža zabudoŭvacca.
Abaroncy skviera sabrali bolš za 500 podpisaŭ pad zvarotam suprać zabudovy skviera Kotaŭka, a taksama pad zaklikam da zabudoŭščykaŭ razhledzieć alternatyŭnyja placoŭki dla budaŭnictva. Žychary i aktyvisty taksama źviartalisia ŭ vykankam, u Minharvykankam i naŭprost da kiraŭnika katalickaj carkvy Tadevuša Kandrusieviča, jakoha prasili vybrać inšaje miesca dla budaŭnictva. Adnak u svaim adkazie na zvarot Kandrusievič paviedamiŭ, što ličyć niemetazhodnym razhlad alternatyŭnych placovak dla budaŭnictva.
