U AAT «140 ramontny zavod» u Barysavie zavieršanaja dośledna-kanstruktarskaja praca pa madernizacyi bronietransparciora BTR-70 da ŭzroŭniu BTR-70MB1.
Jak paviedamiŭ BiełaPAN pradstaŭnik Dziaržaŭnaha vajenna-pramysłovaha kamiteta Biełarusi Uładzimir Łaŭraniuk, realizacyja prajekta pravodziłasia za košt ułasnych srodkaŭ pradpryjemstva. Zamoŭca — Ministerstva abarony.
Pavodle słoŭ Łaŭraniuka, u vyniku realizacyi vydadzienaha taktyka-techničnaha zadańnia ŭdałosia značna palepšyć chadavyja i achoŭnyja charaktarystyki bronietransparciora, a taksama ŭnieści šerah źmien u erhanomiku mašyny. Źmieny nie zakranuli viežavaha kulamiotnaha ŭzbrajeńnia, jano zastałosia štatnym.
Ustanoŭka pravieranaha časam vadamiotnaha ruchavika ad BTR-80 i bolš mahutnaha siłavoha ahrehata — 8-cylindravaha dyzielnaha ruchavika «KamAZ-7403.10» z turbanadduvam mahutnaściu 260 k. s. — zapatrabavała źmien u kanstrukcyi ahrehataŭ tranśmisii, u tym liku prymianieńnia novaj razdatačnaj karobki i pryvadaŭ jaje kiravańnia, a taksama dapracoŭki korpusa mašyny.
U vyniku masa bronietransparciora pavialičyłasia na paŭtary tony i skłała pryblizna 13 t (BTR-70 važyć 11,5 t, BTR-80 — 13,6 t). Heta nijak nie paŭpłyvała na chadavyja jakaści BTR-70MB1, jaki padčas vyprabavańniaŭ zdoleŭ na šašy raźvić chutkaść 92 km/hadz.
Surjoznyja źmieny zakranuli kampanoŭku zabranavanaj prastory. Tak, dla zabieśpiačeńnia kamfortnaha raźmiaščeńnia vajskoŭcaŭ u desantnym adździaleńni pavialičanaja jaho vyšynia na 14 sm, a dla zručnaści vychadu z mašyny — pašyranyja prajomy bakavych lukaŭ z ustanoŭkaj u ich dvuchstvorkavych dźviarej. Dla viadzieńnia ŭstojlivaj i nadziejnaj suviazi BTR-70MB1 atrymaŭ ajčynnuju ličbavuju radyjostancyju R-181-50TU «Drafa». Jana zabiaśpiečvaje pieradaču maŭlenčaj i ličbavaj infarmacyi pa pamiechaabaronienym kanale suviazi.
U metach maskiroŭki i prykryćcia bajavoj mašyny ad ahniu procitankavych srodkaŭ madernizavany BTR abstalavany šaściu ŭstanoŭkami dla pusku dymavych hranat kalibru 81 mm, jakija ŭvachodziać u skład univiersalnaj sistemy 902V «Tuča-2», adstrelvajuć na dalokaść 200—300 m zarady z utvareńniem sucelnaj dymavoj zasłony pamieram 50ch28 m.
Dziaržaŭnyja vyprabavańni BTR-70MB1 skončylisia ŭ listapadzie 2016 hoda.
