Piać čałaviek zahinuli, vosiem atrymali ranieńni ŭ vyniku stralby, adkrytaj u aeraporcie horada Fort-Łoderdejł u amierykanskaj Fłarydzie, paviedamlaje VVS.
AP
Pradstaŭnik administracyi šeryfa akruhi Brovard, u jakim raźmieščany aeraport, paviedamiŭ u tvitary, što zahinuli piać čałaviek.
Šeryf Skot Izraeł paviedamiŭ, što paranienyja vosiem čałaviek, jany adpraŭlenyja ŭ balnicu.
Pa paviedamleńniach miascovych uładaŭ, napadnik zatrymany.
Stralanina pačałasia kala hadziny dnia pa miascovym časie ŭ zale vydačy bahažu druhoha terminała.
Vidavočcy zdareńnia raspaviali žurnalistam kanała MSNBC i inšych telekanałaŭ ab tym, što napadnik, chudarlavy małady čałaviek hadoŭ 20-30 u futbołcy z «Zornymi vojnami», byŭ nibyta paranieny palicejskimi, kali sprabavaŭ pierazaradzić svaju zbroju, mienš čym praz chvilinu paśla taho, jak adkryŭ ahoń.
Paviedamlajecca taksama, što palicyja vyvieła z budynka aeraporta čałavieka ŭ kajdankach praź dźvie hadziny paśla pieršych paviedamleńniaŭ ab stralaninie.
Tym časam šeryf Skot Izraeł zajaviŭ, što palicyja nie zrabiła ni adnaho strełu i što napadnik, jakoha zatrymali, nie paciarpieŭ. Taksama jon zajaviŭ, što niama nijakich padstaŭ ličyć, što napadnikaŭ było dvoje.
Reuters
Pradstaŭnik administracyi šeryfa Čyp Łamarka paviedamiŭ na bryfinhu žurnalistam, što złamyśnik prylacieŭ rejsam z Kanady. U bahažy ŭ jaho byŭ pistalet. Atrymaŭšy bahaž, jon u tualecie dastaŭ pistalet i zaradziŭ jaho.
Paśla hetaha jon adkryŭ stralbu. Łamarka skazaŭ taksama, što nie viedaje, čamu złamyśnik pačaŭ stralać.
Sienatar štata Fłaryda Bił Nelsan zajaviŭ amierykanskim ŚMI, što napadnik identyfikavany i što jaho zavuć Esteban Santjaha. Pa jaho słovach, u złamyśnika było znojdziena paśviedčańnie asoby vajennaha, adnak nie jasna, ci naležaŭ hety dakumient jamu. Hetaja infarmacyja pakul nie była paćvierdžanaja pradstaŭnikami pravaachoŭnych orhanaŭ.
«Na dadzieny momant nam nie viadomyja matyvy, — paviedamiŭ Nelsan. — Heta całkam moh być čałaviek z chvoraj psichikaj. Albo matyvy mohuć być našmat bolš złaviesnymi, pra što nam davodzicca turbavacca kožny dzień. Ja maju na ŭvazie teraryzm. My nie možam zaraz rabić vysnovy».
Miascovyja telekanały pakazali kadry, na jakich miedyki la budynka aeraporta akazvajuć dapamohu akryvaŭlenamu čałavieku.
Na kadrach, źniatych ź viertalota, vidać, što evakujavanyja z pamiaškańnia aeraporta pasažyry stajać na ŭźlotnaj pałasie, a na miesca zdareńnia prybyli karety chutkaj dapamohi i śpiecpadraździaleńni palicyi.
AP
Šerah śviedak padziej apisvali toje, što adbyvajecca, jak paniku.
Fiederalnyja avijacyjnyja ŭłady prypynili vylet i pasadku samalotaŭ u aeraporcie Łoderdejł.
Hety aeraport źjaŭlajecca važnym transpartnym vuzłom štata, siudy prybyvajuć šmatlikija turysty, jakija adpraŭlajucca na adpačynak u Fłarydu.
U źmieščanym niepadalok Mižnarodnym aeraporcie Majami ŭviedzienyja pavyšanyja miery biaśpieki.
