Pryvatnaja amierykanskaja kaśmičnaja kampanija SpaceX ŭ subotu, 14 studzienia, upieršyniu paśla vieraśnioŭskaj avaryi paśpiachova zapuściła rakietu-nośbit Falcon 9 i vyvieła na arbitu kamunikacyjnyja spadarožniki, a jaje pieršaja stupień udała sieła na marskuju płatformu ŭ Cichim akijanie, paviedamlaje Deutsche Welle.
Na arbitu było dastaŭlena 10 aparataŭ spadarožnikavaj telefonnaj suviazi novaha pakaleńnia Iridium NEXT.
Praz vosiem chvilin paśla zapusku pieršaja stupień udała sieła na marskuju płatformu ŭ Cichim akijanie. Upieršyniu takoje viartańnie rakiety-nośbita było paśpiachova aprabavana kampanijaj u krasaviku 2016 hoda.
U vypadku šmatrazovaha vykarystańnia rakiety-nośbita kaśmičnyja paloty stanoviacca ŭ niekalki razy tańniej. «My dasiahniem taho momantu, kali jaje viartańnie stanie rucinaj. Rakietu treba budzie tolki pamyć, zapravić i znoŭ zapuścić», — zajaŭlaŭ kiraŭnik SpaceX Iłan Mask.
1 vieraśnia 2016 hoda na kasmadromie na mysie Kanavierał u štacie Fłaryda rakieta Falcon 9 vybuchnuła za 2 dni da palotu padčas dziažurnaj pravierki ruchavikoŭ. Paciarpiełych padčas incydentu nie było. Adnak nastupny zapusk rakiety nieadnarazova pieranosiŭsia.
