Fota Siarhieja Bałaja, BiełaPAN.
14 čałaviek naviedali ŭpieršyniu arhanizavanuju tematyčnuju pryjomnuju deputata Pałaty pradstaŭnikoŭ, člena Ab`iadnanaj hramadzianskaj partyi Hanny Kanapackaj. Pryjomnaja pracavała 15 studzienia ŭ Minsku, pieradaje BiełaPAN.
Pavodle słoŭ staršyni AHP Anatola Labiedźki, Kanapackaja pryniała «ŭ asnoŭnym ludziej, jakija prapanoŭvali inicyjatyvy abo zakranali piersanalnyja prablemy, źviazanyja z ekałohijaj».
Dzieviać čałaviek pryniała sama deputat, jašče piać — jaje pamočniki.
«Niekalki čałaviek pryjšli z prapanovaj źmieny ziamielnaha zakanadaŭstva. Taksama byli pradstaŭniki «zialonaha» ruchu, jakija prapanoŭvali hłabalnuju pozvu, što možna zrabić u maštabach krainy pa ekałahičnaj prablematycy. Taksama pryjazdžali ludzi z Salihorska i Smarhoni pa ekałahičnaj prablematycy rehijona», — skazaŭ Labiedźka.
Praktyku praviadzieńnia tematyčnych pryjomnych palityk ličyć «bolš čym efiektyŭnaj».
«My praanalizujem prapanavanyja inicyjatyvy, vypracujem płan dziejańniaŭ. Papiarednie my možam vystupić ź inicyjatyvaj stvareńnia niekalkich hrup pa padrychtoŭcy zakonaprajektaŭ, jakija tyčacca papravak u ziamielnaje zakanadaŭstva, utylizacyi śmiećcia, stvareńnia zialonych zon u haradach. Praviadziem niekalki kruhłych stałoŭ pa hetych temach, buduć nakiravanyja deputackija zapyty ŭ roznyja ministerstvy», — adznačyŭ palityk.
Na dumku Labiedźki, praviadzieńnie tematyčnych pryjomaŭ dapamoža stvaryć kamunikacyju z vybarščykami i ekśpiertnaj supolnaściu.
Płanujecca, što nastupnaja tematyčnaja pryjomnaja adbudziecca 12 lutaha, na joj buduć abmiarkoŭvacca pytańni adukacyi.
Kanapackaja bałatavałasia pa Kastryčnickaj vybarčaj akruzie № 97 Minska i pieramahła, nabraŭšy, pavodle aficyjnych danych, 23,7% hałasoŭ vybarščykaŭ.