Prezident Barak Abama, jaki siońnia pakidaje pasadu kiraŭnika ZŠA, źviarnuŭsia da suhramadzian z raźvitalnym listom, zaklikaŭšy ich pracavać nad hramadzianskaj adkaznaściu i pamiatać, što «Amieryka — heta nie prajekt adnaho čałavieka». List raźmieščany na aficyjnym sajcie Biełaha doma i nazyvajecca «Dziakuj»
Patrebu napisać list Abama patłumačyŭ tradycyjaj, jakuju vykonvali prezidenty ZŠA, — pakidać dla kalehi, što źmianiaje jaho na pasadzie kiraŭnika krainy, list z pažadańniami. List pavinny ŭtrymlivać paradu, jak spravicca z adkaznaściu, «jakaja źviazanaja z najvyšejšaj pasadaj u ZŠA i lidarstvam u volnym śviecie». Adnak Abama spačatku vyrašyŭ źviarnucca da amierykancaŭ, piša rbc.ru.
«Bo ŭsio, što ja daviedaŭsia za čas majoj pracy, ja daviedaŭsia ad vas. Vy zrabili mianie lepšym prezidentam, i vy zrabili mianie lepšym čałaviekam», — piša Abama.
Jon adznačyŭ, što na praciahu vaśmi hadoŭ narod ZŠA byŭ dla jaho krynicaj dabryni i nadziei, jakaja dapamahła jamu znajści ŭ sabie siły. «Ja bačyŭ jak hramady i susiedzi rupilisia adzin pra adnaho padčas najhoršaha ekanamičnaha kryzisu ŭ našym žyćci», — adznačyŭ prezident ZŠA.
Abama padkreśliŭ, što natchniaŭsia maładymi vypusknikami i vajskovymi aficerami, navukoŭcami. «Ja bačyŭ amierykancaŭ, čyje žyćci byli vyratavany, bo jany, narešcie, atrymali dostup da miedycynskaj dapamohi, i siemji, čyje žyćci źmianilisia, pakolki ich šluby pryznali roŭnymi našym», — napisaŭ prezident ZŠA ŭ raźvitalnym liście.
U liście Abama adznačyŭ, što niezaležna ad partyi amierykancy pavinny kinuć usie siły na pracu nad hramadzianskaj adkaznaściu.
«I kali prahres zdajecca pavolnym, pamiatajcie: Amieryka — heta nie prajekt adnaho čałavieka. Adzinaje i samaje mahutnaje słova ŭ našaj demakratyi — heta słova «my», — dadaŭ prezident ZŠA. Na zakančeńnie Abama paŭtaryŭ słohan svajoj vybarčaj kampanii: «Tak, my možam».
