Abvinavačany ŭ karupcyi były dyrektar AAT «Mahiloŭsajuzdruk» Alaksandr Čačora pryhavorany da 10 hadoŭ źniavoleńnia ŭ kałonii ŭzmocnienaha režymu z kanfiskacyjaj majomaści. Takoje rašeńnie vynies 20 studzienia sud Leninskaha rajona Mahilova, jaki pryznaŭ Čačoru vinavatym pa ŭsich inkryminavanych jamu złačynstvach.
Čačora taksama pazbaŭleny prava zajmać pasady, źviazanyja z vykanańniem arhanizacyjna rasparadčych, administracyjna-haspadarčych abaviazkaŭ, na piać hadoŭ.
Pavodle prysudu, jaki začytaŭ sudździa Siarhiej Mazuraŭ, Alaksandr Čačora pryznany vinavatym u zavałodańni majomaściu, učynienym z vykarystańniem svaich słužbovych paŭnamoctvaŭ, u kradziažy šlacham złoŭžyvańnia słužbovymi paŭnamoctvami, a taksama ŭ chabarnictvie i niezakonnym abarocie bojeprypasaŭ.
Pavodle danych śledstva, były dyrektar «Mahiloŭsajuzdruku» nieadnarazova niezakonna braŭ z kasy tavarystva hrošy, jakija pastupali ŭ jakaści vyručki ad realizacyi tavarna-materyjalnych kaštoŭnaściaŭ, atrymaŭšy takim čynam ź lutaha 2014 hoda pa sakavik 2015 hoda bolš 285 młn rubloŭ. Akramia taho, jak vyśvietliła śledstva, abvinavačvany atrymaŭ ad dyrektara pryvatnaha pradpryjemstva za vyrašeńnie pytańniaŭ, jakija ŭvachodziać u jaho kampietencyju, chabar u vyhladzie strelby marki «Biereta». Viasnoj 2016 hoda stała viadoma, što ź lutaha 2013 hoda pa luty 2015-ha, złoŭžyvajučy słužbovymi paŭnamoctvami, jon patrabavaŭ ad kiraŭnikoŭ strachavych kampanij pryniać na pracu na pasadu strachavoha ahienta niaviestku.
Raniej Alaksandr Čačora prasiŭ prezidenta ab pamiłavańni, adnak jamu było admoŭlena. Na sudzie były dyrektar nie pryznaŭ siabie vinavatym, nazvaŭšy vystaŭlenyja abvinavačańni «biazhłuździcaj, jakuju prydumała śledstva».
Čačora zajaviŭ BiełaPAN, što budzie abskardžvać vyniesieny prysud. U svaju čarhu advakat padsudnaha Alaksandr Pylčanka zajaviŭ BiełaPAN, što «prysud niespraviadlivy pa pryznačanym pakarańni i pa kvalifikacyi». «Abvinavačvańni, jakija jamu vystaŭlalisia, nie znajšli paćvierdžańnia. Tamu my nie zhodnyja i budziem abskardžvać», — skazaŭ jon.
