17 lutaha ŭ Minsku płanujecca «Marš suprać niezakonnych paboraŭ uładaŭ z hramadzian Biełarusi». Rašeńnie ab praviadzieńni akcyi było pryniataje 20 studzienia na pasiadžeńni savieta Biełaruskaha nacyjanalnaha kanhresa (BNK).
Biełaruski nacyjanalny kanhres stvorany ŭ mai 2016 hoda pa inicyjatyvie hrupy hramadskich i palityčnych dziejačaŭ z metaj kansalidacyi apazicyi. U jaho arhkamitet uvajšli Mikałaj Statkievič, Uładzimir Niaklajeŭ, Stanisłaŭ Šuškievič, Źmicier Daškievič, Viačasłaŭ Siŭčyk, Andrej Sańnikaŭ, Hienadź Fiadynič, Michaił Pastuchoŭ. Ciapier kanhres dziejničaje ŭ formie savieta.
Jak paviedamiŭ BiełaPAN Statkievič, takim čynam saviet BNK vyrašyŭ padtrymać kampaniju prafsajuza rabotnikaŭ radyjoelektronnaj pramysłovaści (REP), jaki źbiraje podpisy za admienu dekreta № 3 «Ab papiaredžańni sacyjalnaha ŭtrymanstva». «Razumiejučy, što hetuju ŭładu tolki zboram podpisaŭ nie praniać, my pryniali rašeńnie ab praviadzieńni maršu, jaki pačniecca 18.00 na Kastryčnickaj płoščy. Jon projdzie praź miesiac paśla pačatku zboru podpisaŭ, jakija my pieradadzim u dziaržaŭnyja orhany ŭłady», — raskazaŭ palityk.
Statkievič padkreśliŭ, što BNK źjaŭlajecca prychilnikam paradku i nie pravodzić hvałtoŭnyja akcyi. «Tamu za piać dzion da jaje praviadzieńnia, pavodle praktyki, jakaja skłałasia ŭ Jeŭropie ŭ demakratyčnych krainach, prainfarmujem ułady pra mierapryjemstva. Na žal, usie zakony ab masavych mierapryjemstvach, jaki prymaje pryznačany parłamient, nie adpaviadajuć Kanstytucyi i mižnarodnym abaviazacielstvam krainy», — dadaŭ jon.
Pra pačatak kampanii pa zbory podpisaŭ za admienu dekreta № 3 prafsajuz REP abviaściŭ 17 studzienia. Padpisacca pad zvarotam možna ŭ centralnym ofisie prafsajuza ŭ Minsku, a taksama ŭ pradstaŭnictvach arhanizacyi ŭ rehijonach. Akramia taho, zbor elektronnych podpisaŭ zapuščany na internet-placoŭkach.
Raniej paviedamlałasia, što šerah demakratyčnych arhanizacyj płanujuć pravieści 15 sakavika ŭ Minsku «Marš darmajedaŭ» za admienu dekreta № 3. U arhkamitet akcyi ŭvajšli Abjadnanaja hramadzianskaja partyja, Biełaruskaja partyja levych «Spraviadlivy śviet», arhkamitety pa stvareńni partyi «Biełaruskaja chryścijanskaja demakratyja», Partyi pracoŭnych i partyi «Nadzieja», Biełaruskaja sacyjał-demakratyčnaja partyja (Hramada), Biełaruskaja partyja «Zialonyja» i hramadzianskaja kampanija «Naš dom».
