Telekanał «Biełsat» raspaŭsiudziŭ infarmacyju pra hrodzienskaha lejtenanta milicyi Michaiła K. Pavodle videasiužeta, K. vykryŭ kanał viarboŭki bajevikoŭ u «DNR», za što akazaŭsia ŭ apale ŭ kiraŭnictva i, u vyniku, za kratami.
«Ad maich ahientaŭ ja atrymaŭ infarmacyju, što aficer pahraničnaha kamiteta v/č 2141 maje parnahrafičnyja materyjały na staroncy i … vychad na niezakonnyja voinskija farmiravańni samaaabvieščanaj «DNR». Pa słovach majho infarmatara, aficer S. moža źvieści z adpaviednymi ludźmi dla najmu va ŭzbrojenyja farmiravańni. Ja nieadkładna dakładvaju pra heta svajmu kiraŭnictvu, rehistruju materyjał — ja maju na ŭvazie parnahrafiju, parnahrafičnyja roliki». «Ale mnie kažuć zabyć pra heta, bo «ŭsio tam uzhodniena», — pryvodzić słovy K. «Biełsat».
Michaił rychtuje dakumienty, kab zhodna ź instrukcyjaj pieradać ich u KDB. Praź niekalki hadzinaŭ kiraŭnik kryminalnaj milicyi telefanuje z telefona vykonvajučaha abaviazki načalnika adziełu narkakantrolu i daje zahad pra spravu zabycca, maŭlaŭ, «tam užo ŭsie ŭzhodniena». Adnak Michaił usio ž vyrašaje danieści infarmacyju da Kamiteta dziaržaŭnaj biaśpieki, na što jahonaje niepasrednaje kiraŭnictva pahražaje zvalnieńniem.
Sa słoŭ svajakoŭ K., paśla hetaha milicyjanieru stali pahražać zvalnieńniem, a ŭrešcie padstavili na atrymańni chabaru ad kalehi, jakuju K. nibyta złaviŭ na «raspaŭsiudzie» parnahrafii praz sacsietki.
U adkaz Ministerstva ŭnutranych spraŭ vydała pres-reliz, u jakim patłumačyła, što zhadany «Biełsatam» 23-hadovy milicyjanier sapraŭdy słužyŭ apierupaŭnavažanym u Hrodnie. Ale, jak śćviardžaje MUS, jon vyjaŭlaŭ fakty raspaŭsiudu parnahrafii ŭ internecie, a paśla patrabavaŭ chabar za niepryciahnieńnie vinavatych da adkaznaści.
Jak śćviardžajecca ŭ pres-relizie, za žnivień 2016 hoda jon takim čynam atrymaŭ kala $400, i jašče $400 patrabavaŭ z čarhovaj achviary.
Žonka trymaje fota Michaiła K., fota «Biełsat».
Žonka lejtenanta vykazała «Biełsatu» dumku, što hałoŭnaj pryčynaj zatrymańnia muža stała toje, što jon znajšoŭ parnahrafiju na staroncy ščučynskaha inśpiektara pa spravach niepaŭnaletnich Aleny B.
Taja, bajučysia stracić rabotu, pačała prapanoŭvać lejtenantu chabar, ale toj, pa viersii žonki, admoviŭsia.
Tamu Alena B., maŭlaŭ, była vymušanaja źviarnucca da svajho ŭpłyvovaha dziadźki-sudździ, jaki ŭrešcie i zabiaśpiečyŭ «padstavu» i pasadku K.
Nijakich dokazaŭ datyčnaści aficera v/č 2141 da viarboŭki lejtenant K. i jahonyja svajaki pakul nie pryviali. Bolš za toje, K. nie viedaje pasady čałavieka, jakoha abvinavačvaje.
U pres-słužbie Pahraničnaha kamiteta «Našaj Nivie» skazali, što kamientavać datyčnaść svajho supracoŭnika da viarboŭki nie buduć, bo ŭsia dokaznaja baza takoha abvinavačańnia hruntujecca na słovach nieviadomaha «ahienta».
Źviartaje ŭvahu, što tema z «kanałam viarboŭki» ŭźnikła jak pabočnaja da spraŭ za raspaŭsiud parnahrafii i raźbiralnictvaŭ vakoł ich.
