Milicyja skončyła pravierku pa zajavie ab mahčymaj abrazie siabram ruchu «Za svabodu» z Kalinkavičaŭ Dzianisam Rabiankom Alaksandra Łukašenki.
Žychar Mačuliščaŭ Viačasłaŭ Safronaŭ, viadomy svaimi adyjoznymi i prarasijskimi vykazvańniami, u pačatku studzienia napisaŭ zajavu na Dzianisa Rabianka, u jakoj prasiŭ pakarać jaho za abrazu Łukašenki na padstavie publikacyjaŭ u sacsietcy «Vkontaktie». Milicyja pačała pravierku. Rabianok źviazvaŭ hety zvarot z t.zv. «spravaj «Rehnuma», sajt jakoha jon patrabavaŭ zabłakavać za antybiełaruskija materyjały.
«Kalinkavickim RAUS pa zvarocie Safronava V.A. pra pryciahnieńni vas da kryminalnaj adkaznaści praviedzienaja pravierka. U zaviadzieńni kryminalnaj spravy admoŭlena», — skazana ŭ adkazie z Kalinkavickaha RAUS za podpisam namieśnika načalnika V.S. Hajkieviča.
«Ja aceńvaju hetaje rašeńnie, viadoma, vielmi stanoŭča. Ale całkam budu spakojny, kali heta prakuratura zaćvierdzić, bo zaraz sprava tam na praviercy, ci ŭsio milicyja pravilna zrabiła», — skazaŭ sajtu ryx.by Dzianis Rabianok.
Jon spadziajecca, «što, moža, ułada, sapraŭdy, pačała razumieć važnaść taho, što treba baranić niezaležnaść» i nahadaŭ, što «paru dzion tamu i sajt samy adyjozny zabłakavali «Sputnik i pahrom»».
«Kali prakuratara zaćvierdzić rašeńnie milicyi i sprava całkam spynicca, to sustrečnych zajaŭ padavać nie płanuju», — dadaŭ siabra ruchu «Za svabodu».
Adnak, jon adznačyŭ, što paśla hetaj historyi byŭ vymušany zakryć staronku, chacia i ličyć, što heta «mo, i da lepšaha». «Našym lepšym adkazam — budzie praca na karyść Biełarusi i Biełaruščyny», — zaklučyŭ Dzianis Rabianok.
