Dziaržaŭny pamiežny kamitet Biełarusi atrymaje kala 1,5 młn jeŭra na ŭdzieł u prajekcie pa budaŭnictvie mihracyjnych centraŭ, jaki budzie finansavać ES, paviedamiŭ siońnia žurnalistam staršynia Dziaržpahrankamiteta Biełarusi Anatol Łapo, pieradaje BIEŁTA.
«My voźmiem udzieł u novym prajekcie, jaki budzie zapuščany ŭ 2017 hodzie. Dziaržpahrankamitetu vyłučajecca kala 1, 5 młn jeŭra. My vyznačym miesca i pabudujem budynak dla ŭtrymańnia zatrymanych parušalnikaŭ dziaržaŭnaj miažy. Heta budzie pamiaškańnie pa typu zvyčajnaha chosteła, dzie treba stvaryć nieabchodnyja bytavyja ŭmovy. Tut buduć pravodzić pracu ź mihrantami pa vyśviatleńni mety parušeńnia miažy, vyrašać pytańni pryciahnieńnia da administracyjnaj adkaznaści, pry nieabchodnaści budzie akazvacca psichałahičnaja dapamoha. Pa hetaj prahramie my taksama atrymajem techničnyja srodki dla ŭzmacnieńnia miažy», — raspavioŭ Anatol Łapo.
Budaŭnictva i rekanstrukcyja centraŭ dla časovaha raźmiaščeńnia mihrantaŭ stanie adnym z troch kampanientaŭ prajekta pa stvareńni mihracyjnych centraŭ u Biełarusi pry padtrymcy ES. Finansavańnie ŭsich troch kampanientaŭ prajekta praduhledžana ŭ abjomie 7 młn jeŭra.
Staršynia Dziaržpahrankamiteta adznačyŭ, što dla Biełarusi, jakaja znachodzicca ŭ hieahrafičnym centry Jeŭropy, prablema nielehalnaj mihracyi zastajecca aktualnaj, praca ŭ hetym kirunku viadziecca z roznymi viedamstvami. Realizavany prajekt na biełaruska-ŭkrainskaj miažy, jaki dazvoliŭ uzmacnić techničny składnik. U 2016 hodzie asvojena $3,6 młn mižnarodnaj techničnaj dapamohi, i ŭdaskanaleńnie biaśpieki miažy praciahniecca, u tym liku z dapamohaj mižnarodnych prajektaŭ.
