Pavodle dadzienych Centra sacyjałahičnych i palityčnych daśledavańniaŭ BDU, davier biełarusaŭ da nacyjanalnych ŚMI vyšejšy, čym da zamiežnych, paviedamiła ministr infarmacyi Lilija Ananič na pasiadžeńni kalehii viedamstva 6 lutaha ŭ Minsku.
«Daśledavańni centra śviedčać, što hramadzianie našaj krainy addajuć pieravahu ŭ atrymańni infarmacyi nacyjanalnym ŚMI. Heta datyčycca pytańniaŭ masava-palityčnaj tematyki, ekanomiki, ekałohii, kultury. Zachoŭvajucca rejtynhi davieru nacyjanalnym ŚMI, i jany značna vyšejšyja, čym rasijskim, zamiežnym».
Ananič zaklikała kiraŭnikoŭ dziaržaŭnych ŚMI zadziejničać usie reziervy dla zachavańnia padpisnych nakładaŭ.
Jana taksama stanoŭča acaniła, jak dziaržaŭnyja ŚMI respublikanskaha i rehijanalnaha ŭzroŭniaŭ raźvivali svaju dziejnaść u internecie ŭ 2016 hodzie.
Na dumku ministra infarmacyi, 2016 hod dla miedyjaśfiery byŭ «nasyčanym, tvorčym i dynamičnym». Srodki masavaj infarmacyi ŭ minułym hodzie pracavali «na kansalidacyju hramadstva i vykanańnie hramadska-palityčnych, sacyjalna-ekanamičnych zadač, jakija stajać pierad krainaj», ličyć jana.
U minułym hodzie vykanany pryniatyja raniej prahramy pa knihavydańni, biełaruskaja knižnaja pradukcyja šyroka była pradstaŭlena za miažoj. U 2017 hodzie kult čytańnia knihi, skazała čynoŭnica, pavinien być prapahandavany jak maha šyrej. «U hod śviatkavańnia 500-hodździa biełaruskaha knihadrukavańnia my stavim zadaču, kab kožny handlovy ab`iekt u našaj sistemie byŭ svojeasablivaj placoŭkaj prapahandy knihi i čytańnia», — zajaviła Ananič.
