Prajšło ŭžo 10 miesiacaŭ z momantu, jak Andrej Vituška, doktar adździaleńnia anestezijałohii RNPC «Maci i dzicia», padaŭ zajaŭku na prahramu MOST. Heta prajekt Jeŭrasajuza, jaki dazvalaje biełaruskim śpiecyjalistam naładžvać prafiesijnyja kantakty z zachodnimi kalehami.
Vituška chacieŭ pajechać na treninh pa neanatalnaj echakardyjahrafii, što dazvoliła b jamu jašče lepš lačyć ciažka chvorych novanarodžanych.
Vituška — kandydat miedycynskich navuk i adzin z najlepšych dziciačych reanimatołahaŭ Uschodniaj Jeŭropy. Kalehi z zachapleńniem kažuć pra jaho, što «jon uratavaŭ žyćcio sotniam dziaciej».
Pa praviłach prahramy, zajaŭnikam musili adkazać praz try miesiacy, ale hetaha nie zdaryłasia. Spadar Andrej pasprabavaŭ razabracca ŭ situacyi i nakiravaŭsia ŭ Instytut imia Hiote, jaki ŭ hetaj prahramie jakraz pracuje z zajaŭkami.
«Ja paznajomiŭsia ź piersanałam instytuta, jaki zajmajecca prahramaj, a taksama ź niekatorymi pradstaŭnikami ofisa Jeŭrakamisii. Što mnie tolki nie kazali ŭ pryvatnych razmovach: «Va ŭsim vinavaty KDB, jaki nie ŭzhadniaje vašu kandydaturu» (z našaha boku prahrama administrujecca MZS), «Vy vydatny kandydat i abaviazkova pajedziecie, niahledziačy na KDB» i trojčy «Prosta treba pačakać», — tłumačyć doktar.
Takim čynam Vituška prapuściŭ niekalki mahčymaściaŭ pajechać na patrebnyja kursy pa ŭltrahukavym daśledavańni serca, jakija ŭ našaj krainie nie pravodziacca.
Dyk jak tak stałasia, što adnamu z najlepšych daktaroŭ, jaki ratuje niedanošanych i novanarodžanych dziaciej, admovili ŭ žadańni palepšyć svaje viedy?
U pradstaŭnictvie ES u Biełarusi kaardynatar prahramy MOST Filip Biernar raskazaŭ «Našaj Nivie», što jany pracujuć u partniorstvie ź Ministerstvam zamiežnych spraŭ. I, maŭlaŭ, kali adzin z bakoŭ nie uzhadniaje kandydaturu, to ŭ navučańni admaŭlajuć. «Składana kazać pra kankretnaha čałavieka, bo my atrymlivajem šmat zajavak, ale, dumaju, z našaha boku admovy być nie mahło», — raspavioŭ Filip Biernar.
Padobny adkaz my atrymali i ŭ Instytucie Hiote: «Andrej Vituška nie adziny, chto skardzicca z hetaj nahody, — pryznaŭ kiraŭnik rabočaj hrupy prajekta Kłaŭs Bajer. — Ale zrazumiejcie, ad nas heta nie zaležyć, my ŭ Instytucie tolki mieniedžary».
Vychodzić, što kandydaturu Vituški nie ŭzhadnili ŭ MZS? My źviarnulisia ŭ ministerstva pa tłumačeńnie, ale tam nam paviedamili, što niemahčyma znajści kankretnuju zajavu tolki pa proźviščy.
Sam doktar vielmi ŭzrušany hetaj historyjaj.
«Chaciełasia b, kab takija prahramy prynosili ŭ Biełaruś jeŭrapiejskija kaštoŭnaści: dakładnaść, prazrystaść, demakratyčnaść, adkaznaść. Nie chaciełasia b nazirać, jak toje, što traplaje na našu ziamlu, pakryvajecca mocham intryh, cenzury i palityčnaj abumoŭlenaści», — napisaŭ Andrej u svaim Facebook.
